रविभन्दा पछि परेका उपेन्द्रले भने- जनसेवा गर्न वरीयताले फरक पर्दैन

काठमाडौँ-  जनता समाजवादी पार्टीका अध्यक्ष उपेन्द्र यादव मन्त्रिपरिषद्को पाँचौँ वरीयतामा परेका छन्। प्रधानमन्त्री र अन्य तीन उपप्रधानमन्त्रीभन्दा पछि उनको वरीयता तोकिएको हो।

उपप्रधानमन्त्रीमध्ये उनी सबैभन्दा पछिल्लो वरीयतामा छन्। एमालेका रघुवीर महासेठ प्रधानमन्त्रीपछिको दोस्रो वरीयतामा छन्। तेस्रो र चौथो वरीयतामा क्रमश नारायणकाजी श्रेष्ठ र रवि लामिछाने छन्।

राष्ट्रपतिबाट उपप्रधानमन्त्रीको शपथ लिएर स्वास्थ्य तथा जनसंख्या मन्त्रालयको कार्यभार सम्हाल्न मन्त्रालय पुगेका यादवले वरीयताले जनसेवा गर्न कुनै फरक नपर्ने बताएका छन्।

‘म त ग्रासरुटमा बसेर काम गर्ने मान्छे हुँ, यस्ता कुरा थाहा पनि हुँदैन, वास्ता पनि हुँदैन’, यादवले भने, ‘जनताको सेवा गर्न वरीयताले फरक पर्दैन।’

यादव २०६५ सालमा प्रचण्ड पहिलो पटक प्रधानमन्त्री भएका बेला मन्त्रिपरिषदमा उपप्रधानमन्त्री तथा परराष्ट्रमन्त्री थिए।

२०७४ सालमा एमाले अध्यक्ष केपी शर्मा ओली प्रधानमन्त्री भएका बेला यादव उपप्रधानमन्त्री तथा स्वास्थ्यमन्त्री थिए।

पछि उनलाई ओलीले स्वास्थ्यबाट हटाएर कानुन, न्याय तथा संसदीय मामिला मन्त्रालयमा पठाएका थिए।

उपप्रधानमन्त्रीहरुको वरीयता निर्धारण गर्दा दलको संसदमा रहेको हैसियतका आधारमा गरिएको छ।

ठूलो दल एमालेका उपप्रधानमन्त्री पहिलो वरीयतामा र त्यसपछि क्रमशः माओवादीका श्रेष्ठ, रास्वपाका लामिछाने र जसपाका यादव छन्।

सरकारमै सहभागी एकीकृत समाजवादीका नेता भानुभक्त जोशी भने आठौं वरीयताको मन्त्री छन्।

२२ सदस्यीय मन्त्रिपरिषदमा जसपाका नवलकिशोर साह सुडी अन्तिम वरीयतामा छन्।

उनी भन्दा अगाडि रास्वपाबाट मन्त्री बनेका नेताहरु छन्।