आफ्नै इन्गेजमेन्ट पार्टीमा ‘बेहुला’को मृत्यु

वेस्टर्न अस्ट्रेलिया- प्रहरी अफिसर बन्न अस्ट्रेलिया गएका एक जना बेलायती पुरुषको आफ्नै इन्गेजमेन्ट पार्टीमा मृत्यु भएको छ।

वेस्टर्न अस्ट्रेलिया (डब्ल्यूए)स्थित घरमा इंगेजमेन्ट पार्टीका क्रममा लडेर २९ वर्षीय लियाम ट्रिमरको निधन भएको हो। पार्टी चलिरहँदा लडेका उनको घाँटीमा चोट लागेको थियो।

लडेपछि तत्कालै स्वास्थ्यकर्मीलाई बोलाइएको थियो। तर स्वास्थ्यकर्मी आइपुग्नुअघि नै उनको मृत्यु भएको अधिकारीहरूले बताएका छन्।

‘यो प्रहरीको लागि साँच्चै कठिन समय हो,’ कमिश्नर कर्नल ब्लान्चले सोमबार स्थानीय मिडियासँग भनेका छन्, ‘उहाँलाई बचाउनको लागि सबै कुरा गरिएको थियो। तर सफल हुन सकेन। यस क्षण साँच्चै पीडादायी छ।’

घटनाको अनुसन्धान थालिएको प्रहरीको भनाइ छ। ट्रिमर अस्ट्रेलियन प्रहरी बलमा भर्ती हुन सन् २०१३ मा बेलायतबाट अष्ट्रेलियामा सरेका थिए।

सन् २०१७ मा प्रहरीको प्रशिक्षण लिएपछि उनी कलगुर्लीमा सरेका थिए। उनले त्यहाँ रहँदा प्रहरीको गिरोह अपराध र रणनीतिक प्रतिक्रियाजस्ता एकाइहरूमा काम गरे।

स्थानीय मिडियाले उनलाई ‘पोस्टर ब्वाई’का रूपमा चित्रित गरेपछि बेलायती नागरिक डब्ल्यूएमा सर्न उत्साहित भएका थिए।

–बीबीसी