एसीसी प्रिमियर कप : ओमनविरुद्ध नेपालको शानदार जित

काठमाडौँ– एसीसी प्रमियर कप अन्तर्गत ओमनविरुद्धको खेलमा नेपालले शानदार जित निकालेको छ। ३११ रनको लक्ष्य पछ्याएको ओमन २२६ रनमा सीमित भएपछि ८४ रनको फराकिलो अन्तरले नेपाल विजयी भएको हो।

४६.३ ओभरमा ९ विकेट गुमाएको ओमानका ११औं नम्बर ब्याट्सम्यान चोटका कारण ब्याटिङ गर्न गएनन्। यसपछि ओमन २२६ रनमा अलआउट भएको हो।

खेल भइरहेको त्रिवि क्रिकेट मैदानमा हावाहुरीका कारण अन्तिमका केही ओभर डिस्टर्ब भएको थियो। त्यतिबेला ओमानलाई २१ बलमा निर्धारित लक्ष्य भेट्नको लागि ८५ रन आवश्यक थियो। तर ऊ अलआउट भयो। खेलमा रहेका अकिब इलियास फिल्डिङका क्रममा घाइते भएर ब्याटिङमा नआएपछि ओमानको सबै विकेट सकिएको हो।

खेलमा शून्य रनमै सुरुका दुई विकेट गुमाएको नेपालले निकै खराब सुरुआत गरेको थियो। यद्यपि कुशल मल्ल र सोमपाल कामीले शानदार पारी खेलेपछि आठ विकेट गुमाएर ३११ रनको लक्ष्य प्रस्तुत गर्न सफल भएको थियो।

जवाफमा सन्दीप लामिछानेले तीन, दिपेन्द्र सिंह ऐरीले दुईका साथै करण केसी र ललित राजवंशीले एकएक विकेट लिएपछि ओमानले लक्ष्य भेट्न नसकेको हो। खेलमा ललितले ९ ओभरमा २२ रन मात्र खर्चिएर सबैभन्दा किफायती बलिङ गरेका थिए।

नेपालको तुलनामा निकै राम्रो सुरुआत गरेको ओमानमा काश्यप प्रजापतिले २५ र जतिन्दर सिंहले १५ रन बनाएका थिए। तेस्रो र चौथो नम्बरमा मैदान पसेका अदिल शफिक र जिसम मक्सुद पनि १३ र शून्य रनमै आउट भए। यससँगै ओमानको सहज सुरुआतमा धक्का लाग्यो र ५५ रन बनाउँदै ४ विकेट गुमाउन पुग्यो। ती चारमध्ये सन्दीप लामिछानेले तीन विकेट लिएका थिए।

२३ औं ओभरमा आयान खान २९ रन बनाएर आउट हुँदा ९९ रन मात्र भए पनि छैटौं विकेटका लागि ओमानले ९६ रनको साझेदारी गरे। जहाँ करणको बलबाट आउट हुनुअघि मोहम्मद नदिमले ६५ र सन्दिप गोउडले ४६ रन बनाएका थिए। गोउड भने ऐरीको बलबाट पेवेलिन फर्किएका थिए।

ओमनले सहज सरुआत गरेपछि तुलनात्मक रुपमा २५ ओभरसम्म खेलमा लिड गरिरहेको थियो। २५ ओभरबाट पछि परेको ओमन खेलमा फर्किन सकेन।

टस हारेर पहिले ब्याटिङ गरेको नेपालका लागि पाँचौ नम्बरमा मैदान प्रवेश गरेका कुशल मल्लले सानदार शतक बनाए। नेपालले पुरा ५० ओभर खेल्दै आठ विकेट गुमाएर ३१० रन बनाएको थियो।

ओपनर कुशल भुतेल र आसिफ शेख शून्य रनमै आउट भए पनि दोस्रो र तेस्रो नम्बरका भीम सार्की र रोहित पौडेलले ५४ रनको साझेदारी गरे। र, रोहित पौडेल ३४ बलमा २३ रन बनाएर आउट भए। त्यससँगै नेपालको ब्याटिङमा केही सुधार देखिन सुरु भयो।

चौथो विकेटका रुपमा भीम सार्की ३३ रन बनाएर आउट हुँदा नेपालले ७२ रन मात्र बनाएको थियो। अघिल्लो खेलमा समेत शानदार प्रदर्शन गरेका कुशल मल्लले आज नेपाली ब्याटिङको उद्धार नै गरे। २९ बलमा ५० रन बनाएका कुशलले ५९ बलमा शतक पूरा गरेका थिए।

४१औं ओभरसम्म टिकेका कुशलले ६४ बलमा १९ बाउन्ड्रीसँगै १०८ रन बनाएर पेबेलियन फर्किए। यो रन एक दिवसीयमा नेपाली इतिहासकै पाँचौ सर्वाधिक रन हो भने कुशलको पहिलो शतक हो।

कुशलले आरिफ शेखसँग ७५, दिपेन्द्र सिंह ऐरीसँग २५ र सोमपाल कामीसँग ३९ रनको साझेदारी गरे। खराब अवस्थामा पुगेको नेपाली ब्याटिङलाई कुशल(मल्ल)ले उत्कृष्ट अवस्थामा पुर्‍याए। आरिफले २९, करण केसीले अविजित २९, दिपेन्द्रले सात रन मात्र बनाउन सके भने सन्दीपले ८ रनको योगदान दिए।

४१औं ओभरको चौथो बलमा कुशल आउट भए पनि त्यसपछि सोमपालले अन्तिममा विस्फोटक ब्याट चलाए। उनको ब्याटले ९ बाउन्ड्रीसहित अविजित ६३ रन बनायो। अन्तिममा करण र सोमपालले ६१ रनको साझेदारी गरे।

नेपालविरुद्ध कसिलो बलिङ गरेको ओमानका विलाल खान, कलिमुल्लाह, जिसन मक्सुद, फायाज बट र अकिब इलियास समान एकएक विकेट लिएका थिए। आयान खानले दुई विकेट लिए। कलिमुल्लाहले सबैभन्दा किफायती बलिङ गरे।