जलिरहेको अवस्थामा महिलाको शव बरामद, घाइते भेटिएकी बालिकाको पनि मृत्यु

जनकपुरधाम– जनकपुरमा जलिरहेको अवस्थामा एक महिलाको शव बरामद भएको छ भने गम्भीर घाइते अवस्थामा फेला परेका बालिकाको पनि मृत्यु भएको छ।

धनुषाको जनकपुरधाम उपमहानगरपालिका-१६ पुलचोकमा रेल्वे लिक नजिक पोखरीको डिलमा बुधबार राति २३ वर्षीया महिलाको शव जलिरहको अवस्थामा प्रहरीले बरामद गरेको हो।

ती महिलाको नजिकै ९ महिनाकी एक बालिका पनि जलेको अवस्थामा फेला परेको थियो।

प्रहरीले उद्धार गर्ने अवस्थासम्म पनि ती बालिका जीवितै रहेको तर उपचारका लागि लैजाने क्रममा मृत्यु भएको धनषाका प्रहरी प्रवक्ता डिएसपी रञ्जन अवाले जानकारी दिए।

पोखरीको डिलमा राति ८ बजेतिर शव जलिरहेको स्थानीयले खबर गरेपछि प्रहरी टोली घटनास्थल पुगेको थियो।

महिलाको शव जलेको अवस्थामा बरामद भएको थियो भने बच्चालाई गम्भीर अवस्थामा उद्धार गरिएको थियो।

मृतक दुवै जनाको सम्बन्ध भने नखुलेको डीएसपी अवाले बताए।

शव महोत्तरीको मनरासिसा नगरपालिका-२ की २३ वर्षीया प्रियंका महतोको रहेको डिएसपी अवाले बताए।

उनीहरू दुवै जनाको शव प्रादेशिक अस्पताल जनकपुरमा राखिएको छ।

यद्यपि पोस्टमार्टम रिपोर्ट र अनुसान्धान पश्चात् मात्र केही भन्न सक्ने डिएसपी अवाले बताए।

घटनाका सम्बन्धमा अनुसन्धान भइरहेको प्रहरीले जानकारी दिए।