सातदोबाटोलाई सहज छैन शीर्षस्थानको ब्याटल, खस्कँदै प्रर्दशन

काठमाडौँ- आइतबार दिउँसो च्यासल रंगशालामा हिमालयन शेर्पालाई हराएर सातदोबाटो क्लब लिग तालिकाको दोस्रो स्थानमा पुग्न चाहन्थ्यो। त्यसैपनि लगातार जित निकालेर शीर्षस्थानमा पाँच अंकको अग्रता बनाइसकेको जावलाखेल युवा क्लबलाई दबाब दिन दोस्रो स्थानको भिडन्त पेचिलो बन्दै गइरहेको थियो।

सातदोबाटोलाई आजको खेलमा स्पष्ट जितको आवश्यकता थियो। सातदोबाटो शेर्पाविरुद्ध जित निकालेर जावलाखेलसँगको अंकान्तर घटाउने योजनामा थियो। तर, नतिजा भने योजना अनुरुपको निस्किएन। सातदोबाटो शेर्पासँग २–२ को बराबरीमा रोकियो।

शीर्षस्थानको ब्याटलमा रहेको सातोबाटोले रेलिगेसन जोनको टिमसँग बराबरी खेल्नुले उसको प्रदर्शन खस्किएको संकेत गरेको छ। ‘पछिल्ला खेलमा हाम्रो प्रदर्शन खस्किरहेको थियो। तर आज हामी राम्रो प्रदर्शन गरेर जित निकाल्ने र दोस्रो स्थानमा पुग्ने कोसिसमा थियौँ। तर सकिएन,’ खेलपछि सातदोबाटोका प्रशिक्षक सनोज श्रेष्ठले भने। 

खेलमा हिमालयन शेर्पाले पनि जितको लागि खेलेको प्रशिक्षक सुमन श्रेष्ठले बताए। तर हिमालयन शेर्पा दुवै पटक गोल डाउनको अवस्थाबाट मुस्किलले मात्र बराबरी गरेको थियो।

‘नहुनु भन्दा एक अंक पनि ठिकै हो भन्नुपर्छ। हामीले पाएको अवसरमा स्कोर गर्न सकेका छैनौँ। र आत्तिएको जस्तो पनि देखिएको छ,’ प्रशिक्षक सुमनले भने। खेलको ४६औं सेकेन्डमै गोल गरेर सातदोबाटोले खेलमा अग्रता बनाएको थियो। पासाङ लामाले बायाँ साइडबाट लामो क्रस गरेपछि दिपक राज सिंह ठकुरीले हेडर गोल गरेका थिए।

योजना अनुसार पहिलो गोल गरेपछि २० मिनेटसम्म बल पोसेन बनाएर अवसर पाएपछि गोल गर्ने गेमप्ले थियो। तर फरवार्ड र मिडफिल्डरले त्यो समयमा अट्याकिङ थर्डमा राम्रो प्रहार गर्न सकेनन्।

विलियम ओपोकु, निरज र दिपकले पोस्टबाहिर धेरै प्रहार गरे। अट्याकमा कम्बिनेसन नै मिलेन। ‘हामीले योजना बनाएअनुसार २० मिनेट त ठिकै भएको थियो। तर, दोस्रो हाफमा डिफेन्स लाइनअलिकति बिग्रियो,’ सनोजले गोल खानुको कारणबारे भनेका छन्।

त्यसँगै पहिलो हाफमा सातदोबाटो १–० ले अघि थियो। त्यसपछि अग्रता बचाउने र जित निकाल्ने लक्ष्य राखेको सातदोबाटोले ७२ औं मिनेटमा गोल खान पुग्यो। निशान लिम्बूले अबायोमीको क्रसमा पोस्टअघिबाट गोल गरे।

‘उनलाई नेपालको वातावरणले साथ दिइरहेको छैन। बिरामी भइरहेका छन्। स्वास्थ्यमा समस्या आइरहेको छ। सोही कारण अन्तिममा खेलाएको हो।’

७९औं मिनेटमा सातदोबाटोले फेरि अग्रता बनाइहाल्यो। सरदोबेक मत्मुरभको पासमा दिपले व्यक्तिगत दोस्रो गोल गरे। ‘पहिलो हाफमा पनि दोस्रो हाफमा पनि योजना अनुरुपकै समयमा गोल निस्किएको थियो। तर हामीले त्यो गोललाई बचाउन सकेनौँ,’ सनोजले भने।

दीपकले गोल गरेको तीन मिनेटमै हिमालयन शेर्पाका सुशील राईले गोल फर्काए। यो बराबरीसँगै सातदोबाटोको दोस्रो स्थानमा पुग्ने सपना सकिएको हो। सनोजले यसलाई टिमको स्कोरमा घाटा लागेको बताएका छन्। ‘हामीले डिफेन्समा टाइट गरेर अग्रता बचाउने लक्ष्य राखेका थियौँ। खेलाडी परिवर्तन गर्दा गर्दै गोल खाइहाल्यौँ,’ अन्तिम गोलबारे सनोजले भने।

सातदोबाटोले उज्वेकिस्तानका सर्दोबे र सर्बियाका इभान पेरिसिचलाई अनुबन्ध गरेको छ। सर्दोबेक सुरुआति ११ मा रहे भने इभान अन्तिम १५ मिनेट बाँकी रहँदा मात्र मैदान छिरेका थिए।

इभानबारे गरिएको प्रश्नमा सातदोबाटोका प्रशिक्षक सनोजले भने, ‘उनलाई नेपालको वातावरणले साथ दिइरहेको छैन। बिरामी भइरहेका छन्। स्वास्थ्यमा समस्या आइरहेको छ। सोही कारण अन्तिममा खेलाएको हो।’

खेलमा मुस्किलले हारबाट जोगिएको हिमालयन शेर्पाका प्रशिक्षक सुमनले आफ्नो टिमले दुई जना मात्र विदेशी खेलाडी खेलाइरहेको कारण राम्रो गर्न नसकेको बताए। ‘खेलमा ७० देखि ८० प्रतिशत विदेशी खेलाडी नै खेलिरहेका छन्। कि त युवा खेलाडीले। हामीले दुई मात्र विदशी खेलाडी राखेको कारण सजिलो भइरहेको छैन।’

आज जित निकाल्न नसकेपछि हिमालयन शेर्पा अझैसम्म पनि रेलिगेसन जोनमा नै छ। तर, अब खेलमा सुधार गर्दै जित निकाल्ने र रेलिगेसजन जोनबाट फुत्किने योजना रहेको प्रशिक्षक सुमनको भनाइ छ। आजको बराबरीपछि हिमालयन शेर्पाको १० अंक भएको छ भने सातदोबाटोको १८ अंक छ।