अन्तिम सुनुवाई हुँदै सन्दीपविरुद्धको मुद्दा

काठमाडौँ- क्रिकेटर सन्दीप लामिछानेविरुद्धको बलात्कार मुद्दामा आज (सोमबार) अन्तिम सुनुवाइ हुने भएको छ। काठमाडौँ जिल्ला अदालतले अन्तिम सुनुवाइ गर्न सोमबारका लागि पेसी तोकेको हो।

यसअघि नै अन्तिम सुनुवाइका लागि पेसी तोकिएको भए पनि मेडिकल टिमका डाक्टरको बकपत्रलाई किशोरी पक्षले अस्वीकार गरेको परेपछि मुख्य डाक्टरको बकपत्र मगाइएको थियो। यसका साथै क्रिकेटर साहब आलमको पनि बकपत्र गराइएको छ। उनीहरू दुवै जनाको बकपत्र बुधबार जिल्ला अदालतमा पुगेको छ। किशोरीको उमेर यो मुद्दामा विवादित बनेको छ।

एक किशोरीले सन्दीपविरुद्ध बलात्कार अभियोगमा २०७९ भदौ २१ गते गौशाला प्रहरी वृत्तमा जाहेरी दिएकी थिइन्। असोज २० गते स्वदेश फर्किएपछि सन्दीपलाई थुनामा राखेर प्रहरीले मुद्दाको अनुसन्धान गरेको थियो।

कात्तिक २९ गते काठमाडौँ जिल्ला अदालतले लामिछानेलाई पुर्पक्षका लागि थुनामा पठाउन आदेश दिएको थियो। पुस २८ गते उच्च अदालत (पाटन)ले उक्त आदेश बदर गरी २० लाख रुपैयाँ धरौटीमा रिहा गर्न आदेश जारी गर्‍यो। उच्चले उनलाई विदेश जान प्रतिबन्ध गरेको थियो।

फागुन १५ गते सर्वोच्च अदालतले सन्दीपलाई विदेश जान लगाइएको प्रतिबन्ध पनि फुकुवा गरिदिएको थियो। नेपाल क्रिकेट संघ (क्यान)को माघ १७ गते पोखरामा सम्पन्न बोर्ड बैठकले लामिछानेको निलम्बन फुकुवा गरेको थियो। त्यसयता सन्दीपले राष्ट्रिय टोटीबाट नियमित रूपमा क्रिकेट खेलिरहेका छन्।