सर्वोत्तम सिमेन्टले पारित गर्‍यो १५ प्रतिशत लाभांशको प्रस्ताव

काठमाडौँ– सर्वोत्तम सिमेन्ट लिमिटेडको साधारण सभाले सेयरधनीहरूलाई १५ प्रतिशत ( कर सहित) नगद लाभांश बाड्ने प्रस्ताव पारित गरेको छ। वैशाख १२ गते रुपन्देहीको भैरहवास्थित होटल सिद्धार्थ भिलासामा सम्पन्न पाचौँ साधारण सभाले यस्तो प्रस्ताव पारित गरेको हो।

सभाले लेखापरीक्षकको प्रतिवेदनसहितको २०८० आषाढ मसान्तको वासलात, सोही मितिमा समाप्त भएको आ.व. २०७१/०८० को नाफा नोक्सान हिसाब सोही अवधिको नगद प्रवाह विवरण लगायतका वित्तीय विवरण, आर्थिक वर्ष २०८० / ०८१ को लेखापरीक्षकको नियुक्ति तथा निजको पारिश्रमिक तोक्ने प्रस्ताव पनि पारित गरेको छ।

सभाले संस्थापक शेयरधनी समूहबाट ५ (पाँच) जना संचालकहरु विष्णु प्रसाद न्यौपाने, विमल कुमार सावरथिया, टिकाराम न्यौपाने, तेन्जीङ लाग्देन तामाङ, उत्सब न्यौपाने र सर्वसाधारण शेयरधनीबाट शिव सिंह कार्कीलाई सञ्चालकमा निर्वाचित समेत गरेको छ। स्वतन्त्र संचालकमा  नेहा अग्रवाललाई मनोनित गरिएको छ।

सभामा कम्पनीका प्रमुख कार्यकारी अधिकृत सन्तोष केसीले सर्वोत्तम सिमेन्टलाई उत्कृष्ट कम्पनी बनाउने प्रतिबद्धता जनाए।

सिमेन्टले हालसम्म ६ करोड ७२ लाख ६८ हजार ०२१ बोरा सिमेन्ट र २८ लाख ८६ हजार १६६ टन किल्ङ्ककर उत्पादन गरी बिक्री गर्न सफल भएको जानकारीसमेत उनले गराए।

उद्योगसँग ३००० मेट्रिकटन प्रतिदिन उत्पादन क्षमता भएको सिमेन्ट प्लान्ट तथा ३००० मेट्रिकटन प्रतिदिन क्षमता भएको क्लिंकर प्लान्ट छ।

आइएसओ ९००१ गुणस्तर प्रमाणित, १४००१ वातावरण-मैत्री प्रमाणित र नेपाल गुणस्तरका साथै भारत गुणस्तरबाट समेत प्रमाणित भएको कम्पनीले ४३ ग्रेड र ५३ ग्रेडमा ग्रीन सर्वोत्तम ओपीसी र सौरभ ग्रीन पिपीसी ब्राण्डका सिमेन्ट उत्पादन गर्दै आएको छ।

भारतमासमेत निर्यात गर्दै आएको सिमेन्टले सहायक कम्पनीमार्फत झापा भद्रपुरमा दैनिक ३०० टन क्षमताको मनषा सिमेन्ट इन्डष्ट्रिज प्रालि खरिद गरी हाल परीक्षण उत्पादन सुरु गरेको छ।