गण्डकी प्रदेशकाे मुख्यमन्त्रीमा पाण्डे नियुक्त

पोखरा- गण्डकी प्रदेशको मुख्यमन्त्रीमा सुरेन्द्रराज पाण्डे नियुक्त भएका छन्। बिहीबार प्रदेश प्रमुख पृथ्वीमान गुरुङले कांग्रेस संसदीय दलका नेता पाण्डेलाई मुख्यमन्त्रीमा नियुक्त गरेका हुन्।

पाण्डेलाई कांग्रेसका २७, नेकपा माओवादी केन्द्र ७ र स्वतन्त्र सांसद दीपक मनाङेको समर्थन छ। बहुमत सदस्यले समर्थन गरेपछि प्रदेश प्रमुखले उनलाई संविधानको धारा १६८ को उपधारा २ अनुसार मुख्यमन्त्रीमा नियुक्त गरेका हुन्।

नवनियुक्त मुख्यमन्त्रीको शपथ शुक्रबार मध्याह्न १२ बजेपछि हुने प्रदेश प्रमुखको कार्यालयका प्रवक्ता चण्डीप्रसाद अर्याल जानकारी दिए।

६० सदस्यीय प्रदेश सभामा बहुमतका लागि ३१ सांसदको समर्थन चाहिन्छ। गण्डकीमा एमालेका २२, नेपाली कांग्रेसका २७, माओवादीका ८ (सभामुखसहित), राप्रपाका २ जना र स्वतन्त्रबाट चुनाव जितेर समाजवादी पार्टी प्रवेश गरेका एक सांसद छन्।

नेपाली कांग्रेसका केन्द्रीय सदस्य एवं नेपाली कांग्रेस गण्डकी प्रदेश संसदीय दलका नेता पाण्डे पिता कृष्णराज र आमा योगेन्द्रकुमारीको कोखबाट २०२१ भदौ ९ गते जन्मिएका थिए। विद्यार्थीकालदेखि नेपाली कांग्रेसको भातृसंस्था नेविसंघमा आवद्ध पाण्डेले त्रिभुवन विश्वविद्यालयबाट स्नातक गरेका छन्।

शालीन, इमान्दार, प्रखर वक्ता र नतिजामा विश्वास गर्ने नेताको रुप परिचय बनाएका पाण्डे राजनितिक संघर्षका क्रममा २०४५ साल, शाही शासन २०६१ सालमा गरी ८ महिना जेलजीवन बिताएका छन्।

२०३६ सालमा ने वि संघको सदस्यता लिएर विद्यार्थी आन्दोलनमा होमिएका उनी २०३९ सालमा नेविसघ अस्कल इकाइ सचिव हुँदै २०४५ सालमा त्रिचन्द्र क्याम्पसका स्ववियु सभापति निर्वाचित भएका थिए।

२०४९ मा नेविसंघको केन्द्रीय सदस्य बनेका उनी २०५९ मा नेपाल तरुण दलको महासचिव थिए। हाल तेस्रो पटक नेपाली कांग्रेस केन्द्रीय सदस्य बनेका पाण्डे २०७४ साल मा राष्ट्रियसभामा सांसद रहिरहेका छन्।

राष्ट्रिय सभामा रहदा प्रतिपक्ष दलका नेताको बलियो र प्रभावशाली भुमिका निर्वाह गरेका उनको कामको पार्टी भित्र र बाहिर पनि प्रशंसा भएको थियो।

गोरखा क्षेत्र नम्बर २ मा संघीय क्षेत्रमा एकल सिफारिस भएका पाण्डे कांग्रेस र माओवादीको चुनावी तालमेल र माओवादी अध्यक्ष पुष्पकमल दाहाल प्रचण्ड गोरखा आउने भएपछि मुख्यमन्त्री बनाउने शीर्ष नेताको योजनामै गोरखा क्षेत्र नम्बर २ (२) मा चुनाव लडेका थिए।