टिम संख्या बढ्यो, तर पुरानै शैलीमा हुनेछ विश्वकप

विश्व फुटबलको सर्वोच्च निकाय फिफाले विश्वकप २०२६ को लागि नयाँ मोडेल ल्याउने बताए पनि पुरानै शैलीमा खेलाउने भएको छ। अफ्रिकी मुलुका रुवान्डामा सम्पन्न फिफा कंग्रेसमा विश्वकपले सहभागी देश ३२ बाट ४८ मा पुर्‍याउने निर्णय गरेको छ। तर प्रतियोगिताको शैली भने उही रहने निर्णय फिफाको छ।

आउँदो विश्वकपमा ४८ देशहरूलाई समान ४–४ टिमको समूहमा विभाजन गरेर १२ समूह बनाइने भएको छ। सो समूहअन्तर राउन्ड रोविनमा भएको प्रतिस्पर्धाबाट शीर्ष दुई टिम गरि २४ टिम अर्को चरणमा पुग्ने छन्।

‘विश्वकपको शंसोधित ढाँचाले मिलिभगतको जोखिमलाई पनि कम गरेको छ र प्रतिस्पर्धी टोलीहरुबीच सन्तुलित आराम समय प्रदान गर्दै सबै टिमलाई कम्तीमा तीन खेल खेल्न पाउने सुनिश्चितता प्रदान गरेको छ,’ फिफाले जारी गरेको सूचनामा भनिएको छ। यो संशोधन रुवान्डामा भएको फिफाको महासभाले पारित गरेको थियो।

त्यस्तै, अब समूह चरणबाट सिधै प्रि क्वार्टरफाइनल हुने छैन। समूह चरणपछि र प्रिक्वार्टरफाइनलभन्दा पूर्व अन्तिम ३२ चरण थपिने भएको छ। समूह चरणमा हरेक समूहका शीर्ष २ दुई टिम त्यो चरणमा पुग्नेछन्। त्यसैगरि १२ समूहमध्ये तेस्रो स्थानमा रहने उत्कृष्ट आठ टिमले पनि अर्को चरणमा स्थान बनाउने छन्। यसरी ३२ टिम छनोट हुनेछन्। ति टिमले नकआउट खेल्नेछन्। जसबाट जित निकाल्ने टिम प्रिक्वार्टरफाइनल, क्वार्टरफाइनल र सेमीफाइनल हुँदै फाइनलसम्म पुग्नेछ। यसकारण अब प्रतिस्पर्धामा ६४ खेलबाट ४० खेल बढेर १०४ खेल हुने भएको छ।

सन् १९९८ मा विश्वकपमा सहभागी टिमको संख्या ३२ बनाएसँगै चार टिमको समूह र शीर्ष दुई टिम नकआउटमा पुग्ने शैलीको स्थापना गरिएको थियो। अहिले पनि त्यही शैलीलाई कायम राखिएको हो।

यसअघि फिफाले ४८ टिम बनाएपछि खेलसंख्या धेरै हुने भएको कारण तीन–तीन टिमका १६ समूह बनाउने जानकारी दिएको थियो। त्यसो गर्दा खेलसंख्या ८० हुने थियो र समूहमा हरेक टिमले दुई मात्र खेल खेल्नुपर्ने हुन्थ्यो। तर अब पुरानै शैलीमा कम्तिमा तीन खेल खेल्नुपर्ने हुन्छ।

फिफाका अध्यक्ष जियान्नी एन्फान्टिनोले पुरानौ शैलीमा कतार विश्वकप सफल भएको र उल्लासमय भएको बताउँदै यही शैलीलाई कायम राख्ने बताएका थिए। रुवान्डामा सकिएको बैठकले यो पनि निर्णय गरेको छ। सन् २०२६ को विश्वकप फाइनल खेल जुलाई १९ आइतबार हुनेछ। त्यही वर्षको जुन २५ मा प्रतियोगिता सुरु हुँदा सबै क्लबले खेलाडी अनिवार्य रुपमा रिलिज गर्नुपर्ने छ।

त्यस्तै ३२ क्लब सहभागी बन्नेगरि सन् २०२५ बाट क्लब विश्वकप पनि सुरु हुने भएको छ। यो विश्वकप पनि हरेक चारचार वर्षमा आयोजना हुनेछ। यो विश्वकपमा सबै महादेशका क्लबस्तरका महादेशीय प्रतियोगिता चार वर्षसम्म जित्ने टिम विश्वकपमा सिधै छनोट हुनेछन्।

त्यस्तै, पछिल्लो समय च्याम्पियन्स लिग जितेका चेल्सी र रियल मड्रिडले विश्वकपमा स्थान बनाइसकेका छन्। अरु टिमहरु भने चार वर्षको क्लब र्‍याङ्किङबाट छनोट गरिने छ।