आजदेखि चीनसँग जोडिएका १४ वटा नाका खुल्दै

काठमाडौँ- कोरोनाकालमा चीन सरकारले बन्द गरेका संखुवासभाको किमाथांकासहित उत्तरतर्फका १४ वटा परम्परागत नाका आजदेखि खुल्ने भएका छन्।

चीनसँग जोडिएका १३ जिल्लाका ती नाकाहरू २०७६ सालदेखि बन्द भएका थिए। बन्द भएका नाका औपचारिक रुपमा खुलेको घोषणा गर्न उपप्रधान एवम् परराष्ट्रमन्त्री नारायणकाजी श्रेष्ठ अहिले किमाथांका जाने भएका छन्।

त्यहीँबाट उनले किमाथांकासहित १४ वटा नाका एकैपटक खुलेको घोषणा गर्ने कार्यक्रम रहेको संखुवासभाका प्रमुख जिल्ला अधिकारी ध्रुवबहादुर खड्काले जानकारी दिए। संखुवासभाको किमाथांकासँगै गोरखा, ताप्लेजुङ, तेह्रथुम, सोलुखुम्बु, दार्चुला र दोलखाका परम्परागत नाका आजदेखि खुल्न लागेका हुन्।

उपप्रधान एवम् परराष्ट्रमन्त्री नारायणकाजी श्रेष्ठले गएको चैतमा चीनको औपचारिक भ्रमणका अवसरमा नेपाल–चीन सीमा क्षेत्रमा रहेका परम्परागत नाका खुलाउने समझदारी भएको थियो।

रसुवागढी–केरुङ, तातोपानी–झाङ्मु, यारी–पुरान तथा नेचुङ–लिची (कोरला) व्यापारिक नाका यसअघि नै सञ्चालनमा आइसकेका छन्। किमाथांका नाका पुनः सञ्चालन गरेर सीमावर्ती क्षेत्रमा सहज आवतजावतका व्यवस्था मिलाउन भोटखोलाबासीले पटकपटक सरकारको ध्यानाकर्षण गराउँदै आएका थिए।