माधव नेपाल र झलनाथ खनालसँग पालैपालो कुरा गरे प्रचण्डले

काठमाडौँ- प्रधानमन्त्री नेकपा (एकीकृत समाजवादी)का अध्यक्ष माधवकुमार नेपाल र नेता झलनाथ खनालसँग पालैपालो भेट गरेका छन्। प्रधानमन्त्री निवास बालुवाटारमा नेकपा एस दुवै नेतालाई बोलाएर कुराकानी गरेका हुन्।

प्रधानमन्त्री प्रचण्डसँग कुराकानी गरेर बाहिरिने क्रममा नेता खनालले हालको एमाले-माओवादी र रास्वपा-नेकपा एसको गठबन्धन तलमाथि हुने सम्भावना नरहेको जिकिर गरे। प्रचण्डले खनालबीच झन्डै आधा घण्टा कुराकानी गरेका थिए।

विपक्षी दलहरू वर्तमान गठबन्धन भत्काउन कस्सिएर लागेको सन्दर्भमा कुराकानी भएको खनालले बताएका छन्। उनले गठबन्धनलाई थप कसिलो बनाउने रणनीतिबारे पनि कुराकानी भएको बताए।

अहिलेको समीकरणमा कुनै समस्या नरहेको खनालको जिकिर छ।

यसअघि प्रधानमन्त्री पुष्पकमल दाहाल ‘प्रचण्ड’ले नेकपा एसका अध्यक्ष माधवकुमार नेपालबीच टेलिफोनमा कुराकानी गरेका थिए।

बिहीबार बिहान उनीहरूबीच समसामयिक राजनीतिक घटनाक्रमका विषयमा कुराकानी भएको प्रधानमन्त्री दाहालको सचिवालयले बताएको छ।

प्रधानमन्त्री दाहालसँगको कुराकानीमा अध्यक्ष नेपालले आफू अहिलेकै समीकरणमा प्रतिबद्ध रहेको र मधेसमा पनि वर्तमान गठबन्धनकै सरकार बन्ने बताएका थिए।

बुधबार अध्यक्ष नेपाल प्रमुख प्रतिपक्षी नेपाली कांग्रेसका सभापति शेरबहादुर देउवाको निवास बूढानीलकण्ठमा भेटका लागि पुगेका थिए। भेटमा जनता समाजवादी पार्टी नेपालका अध्यक्ष उपेन्द्र यादव र लोसपाका अध्यक्ष महन्थ ठाकुर पनि सहभागी भएका थिए।

उक्त छलफलमा देउवासहित कांग्रेसका अधिकांश पदाधिकारी पनि सहभागी थिए।

भेटमा अध्यक्ष यादवले मधेश सरकारका लागि विश्वासको मत दिने वातावरण बनाउन आग्रह गरेका थिए। सुदूरपश्चिममा एकीकृत समाजवादी संसदीय दल नेता दीर्घ सोडारी मुख्यमन्त्री भएका बेला एमाले सरकारमा सहभागी भएको छैन।

अध्यक्ष यादवले मधेश सरकार जोगाउने विषयमा सकारात्मक भूमिका खेलिदिन बैठकमा आग्रह गरेका थिए।

उता नेकपा एसका अध्यक्ष माधवकुमार नेपाल बुधबार बूढानीलकण्ठ गएको दृश्यचाहिँ आफूलाई नमीठो लागेको बताए।