प्रचण्ड सरकारलाई दिएको समर्थन फिर्ता लिने रास्वपाको संकेत

काठमाडौं– रवि लामिछाने नेतृत्वको राष्ट्रिय स्वतन्त्र पार्टी (रास्वपा) ले पुष्पकमल दाहाल प्रचण्डलाई प्रधानमन्त्रीमा दिँदै आएको समर्थन फिर्ता लिने संकेत गरेको छ। रास्वपाले सोमबार एकै दिन केन्द्रीय कार्यसमिति र संसदीय दलको बैठक आह्वान गरेर प्रचण्ड सरकारबारेको आधिकारिक धारणा सार्वजनिक गर्ने भएको हो।

यद्यपि माओवादी मन्त्रीहरु र प्रधानमन्त्री प्रचण्डले रविले जुन–जुन मन्त्रालय माग्छन्, त्यसलाई सहजै स्वीकार्ने बताइसकेका छन्। रास्वपाले सरकारलाई दिएको समर्थन फिर्ता लिए पनि प्रधानमन्त्रीको कुर्सी अल्पमतमा पर्ने छैन।

रास्वपाले प्रचण्ड नेतृत्वको सरकारले पछिल्लोपल्ट ल्याएको न्यूनतम साझा कार्यक्रममा असहमति जनाएको छ। ‘एमाले नेतृत्वको गठबन्धन हुँदा रास्वपाको माग सम्बोधन गरिएको थियो। अहिले त्यसमा फेरबदल गरिएपछि प्रचण्ड सरकारमा हाम्रो नीतिगत अपनत्व छैन,’ रास्वपाका नेता अर्यालले भने, ‘सोही कारण सरकारमा जाने सम्भावनै छैन।’

चितवन २ को उपनिर्वाचन प्रचारका बेलासमेत पार्टी सभापति लामिछानेले सरकारलाई समर्थन दिनुपर्ने कारण नरहेको विभिन्न आमसभामा भन्दै आएका थिए। रास्वपा २२ माघमा प्रचण्ड सरकारबाट फिर्ता भएको थियो।

संसदीय दलको नेताबाट डोलप्रसाद अर्यालले राजीनामा दिएपछि खाली ठाउँ भर्न संसदीय दलको बैठक तय गरिएको र पछिल्लो राजनीतिक परिस्थितिबारे पार्टीको धारणा तय गर्न केन्द्रीय समिति बैठक बोलाइएको रास्वपाले जनाएको छ। शनिबार केन्द्रीय कार्यसमिति र संसदीय दलको बैठकबारे रास्वपाले जुम मिटिङ गरेर जानकारी दिएको थियो।

उपसभापति अर्यालले राजीनामा दिएपछि सोमबार बस्ने बैठकले सभापतिलाई संसदीय दलको नेता चुन्नेछ। सोमबार बिहान ११ बजे केन्द्रीय समिति बैठक र दिउँसो ३ बजे संसदीय दलको बैठक बोलाइएको छ।