क्रिकेट मैदानमा मजदुरको मजबुरी [तस्बिरहरू]

काठमाडौँ- एसीसी प्रिमियर कपको फाइनल खेल थियो। खेल सुरु नहुँदै मैदान परिसरमा पुग्नेहरूमा खेलाडी, अधिकारी, सुरक्षाकर्मी र दर्शक मात्र थिएनन्, मजदूरहरू पनि थिए। मैदान पुग्नेहरू बढेपछि आफूहरूको मजबुरी टार्न थप सहयोग हुने अपेक्षाले मजदूर पनि खेल सुरु नहुँदैदेखि मैदान पुगिरहेका थिए।

बीचमा नै वर्षा भयो। खेल रोकियो। वर्षा भएर खेल रोकिएपनि न दर्शकले प्यारापिट छोडे, न त मजदूरले आफू काम गर्दै आएको स्थान नै छोडे।

मैदान परिसरमा पानी, आइसक्रिमलगायतका वस्तु विक्री गरिरहेका मजदूरले खेल रोकिएको सूचना नआउन्जेल पानी नै परे पनि सेवा दिइरहे।

संयोगले नेपालको फाइनल खेल चलिरहेका बेला विश्वभर मजदुर दिवसका कार्यक्रम पनि चलिरहेका थिए। तर मैदान पुगेका मजदूरलाई धेरथोर खेलबारे चासो भए पनि मजदुर दिवस र त्यससम्बन्धी कार्यक्रमको भने कुनै परवाह थिएन, ठूलो परवाह त कमाइको थियो। जुन कमाइले बिहानबेलुका हातमुख जोर्न थोरै भएपनि सहयोग गर्दथ्यो।