बेलायती सत्तारुढको लज्जास्पद हार, प्रधानमन्त्री बन्दै लेबरका स्टार्मर

लन्डन- बेलायतमा १४ वर्षपछि लेबर पार्टी सत्तामा फर्किएको छ। लेबर पार्टीले सरकार बनाउन आवश्यक ३ सय २६ सिटको आँकडा पार गरेको छ।

किअर स्टारमरको नेतृत्वमा लेबर पार्टी १९९७ पछिकै सबैभन्दा ठूलो विजयतर्फ अघि बढेको हो।

लेबरले हालसम्म ४१० सिट जितिसकेको छ भने वर्तमान प्रधानमन्त्री ऋषि सुनकको कन्जरभेटिभ पार्टीले ११९ सिट मात्र जित्न सफल भएको छ। यद्यपि थप ६ सिटको नतिजा आउन बाँकी छ।

अघिल्लो चुनावमा भन्दा यसपालि लेबरले थप २०९ सिटमा जित हासिल गरेको छ। कन्जरभेटिभले २४८ सिट गुमाएको छ।

योसँगै लेबर पार्टीका कियर स्टार्मर बेलायतको नयाँ प्रधानमन्त्री बन्ने पक्का भएको छ। स्टार्मर सन् २०२० मा जेरेमी कोर्बिनलाई पछि पार्दै लेबर पार्टीका नेता चुनिएका थिए।

एक्जिट पोलले बेलायतका कुल ६५० सिटमध्ये लेबरले ४१० सिट जित्ने देखाएको थियो। कन्जरभेटिभ पार्टीले १३१ सिटमा अग्रता लिने बताएको थियो। तर यो सिट पनि पुर्‍याउन उसलाई मुस्किल परिरहेको छ।

कन्जरभेटिभ पार्टीले १३१ सिट नपुर्याउने भएकाले यो उसका लागि अहिलेसम्मकै सबैभन्दा नराम्रो हार भएको छ।

सन् २०१९मा कन्जरभेटिभ पार्टीले ६५० सिटमध्ये ३६४ सिट जितेको थियो। उक्त पार्टीबाट बोरिस जोनसन प्रधानमन्त्री बने। उनले अघिल्लो पटकको भन्दा ४७ सिट बढाएका थिए। तर यसपटक अवस्था ठिक उल्टो बन्यो।

२०१९ को चुनावमा विपक्षी लेबर पार्टीको सिट संख्या घटेको थियो।

यसपालि कियर स्टारर कम्तीमा पनि ४१० लेबर सांसदहरूका साथ प्रधानमन्त्री बन्नेछन्। यो जित टोनी ब्लेयरको सन् १९९७ को ऐतिहासिक जितभन्दा थोरै मात्र कम हो।

लेबर पार्टीले ३० वर्षअघि अर्थात १९९७ मा अहिलेसम्मकै ठूलो जित हासिल गरेको थियो। तत्कालीन लेबर पार्टीका नेता टोनी ब्लेयर थिए र ४१९ सिट जितेका थिए भने कन्जरभेटिभहरू १६५ सिटमा सीमित थिए।

यस चुनावमा तेस्रो स्थानमा लिबरल डेमोक्र्याट छ। जसले ७१ सिटमा जित हासिल गरेको छ।

चुनावमा आफ्नो दलले लज्जास्पद हार खेपेपछि बेलायती प्रधानमन्त्री तथा कन्जरभेटिभ पार्टीका नेता ऋषि सुनकले राजीनामा दिएका छन्।

उनले लेबर नेता कियर स्टाररलाई विजयी भएकोमा बधाई पनि दिएका छन्।

उनले भने, ‘बेलायतका जनताले सम्मानजनक फैसला दिएका छन्। धेरै धेरै सिक्न आवश्यक छ। म हारको जिम्मेवारी लिन्छु।’

ऋषि सुनकले योर्कशायरको रिचमण्ड सिट कायमै राखेका छन्। आफ्नो सिटमा जितेपछि उनले भने, ‘चुनावमा लेबर पार्टीले जितेको छ। म केयर स्टाररलाई बधाई दिन्छु।’

कन्जरभेटिभ नेताहरूले चुनावमा कमजोर प्रदर्शनको लागि आफ्नो पार्टीको खुलेर आलोचना गरिरहेका छन्।

४४ वर्षीय ऋषि सुनक सन् २०२२ को अक्टोबरमा बेलायतको प्रधानमन्त्री बनेका थिए। ऋषिका आमाबाबु भारतीय मूलका हुन् र उनी बेलायतको पहिलो गैर-गोरा प्रधानमन्त्री बनेका थिए।

–बीबीसीको सहयोगमा