दार्चुला हिमपहिरो : बेपत्ताको पहिचान खुल्यो, हिमपातले उद्धारमा सकस

खलंगा– दार्चुलाको व्यास गाउँपालिका–१ बोलिङमा हिमपहिरोमा परी बेपत्ता भएका पाँच यार्सा संकलकको पहिचान खुलेको छ। बेपत्ता भएका चार महिला र एक पुरुषको पहिचान खुलेको हो।

सशस्त्र प्रहरी बल नेपाल नम्बर ५० गुल्म छाङरुका प्रहरी नायब उपरीक्षक ईश्वरीदत्त भट्टका अनुसार बेपत्ता हुनेमा दार्चुलाको दुहँु गाउँपालिकाका ३८ वर्षीया कमला कुँवर र १८ वर्षीय प्रवीण कुँवर रहेका छन्। दुवै आमाछोरा हुन्।

यस्तै, डोटीको जोरायल गाउँपालिकाका ४५ वर्षीया नक्नी डोल्मा थापा, २८ वर्षीया ईश्वरी थापा र १५ वर्षीया क्षिमी सोमो थापासमेत हिमपहिरोमा बेपत्ता भएका छन्।

गए रातीदेखिको लागातारको वर्षा तथा हिमपातका कारण बेपत्ताको उद्धारमा कठिनाइ भएको डिएसपी भट्टले बताए। ‘रातिदेखि वर्षा र हिमपात एकसाथ भइरहेको छ, उद्धारका लागि लेकतर्फ उक्लिन सकिरहेका छैनौं’, उनले भने, ‘हिमपात रोकिएपछि घटना स्थल जाने तयारीमा छौं।’

मंगलबार दिउँसो हिमपहिरो जाँदा यार्सा संकलक बस्दै आएका त्रिपाल हिउँले पुरिएका थिए। केही व्यक्तिले भागेर ज्यान जोगाएका थिए। डिएसपी भट्टको नेतृत्वमा सशस्त्र प्रहरीको २५ जनाको टोली मंगलबार साँझ घटना स्थलमा पुगेको थियो।

वर्षा र हिमपातका कारण उद्धारमा कठिनाइ भएपछि सो टोली गए राती छाङरुस्थित गुल्ममा फर्किएको थियो। ‘घटना स्थल वरपर बाक्लो हिमपात भएकाले बस्नै सकिएन। राती अँध्यारोमा हिउँ पन्छाउन सकिने अवस्था थिएन’, डिएसपी भट्टले भने।

हिमपहिरोबाट जोगिएका २० जना यार्सा संकलकलाई आफूसँगै सुरक्षित स्थानमा ल्याएर राखिएको उनले बताए। वर्षा र हिमपातका कारण यार्सागुम्बा सङ्कलन प्रभावित बनेको छ।

संकलक केही दिनयता त्रिपालमुनि बस्दै आएका थिए। उनीहरू यार्सा संकलन गर्न हिउँ पग्लिने पर्खाइमा थिए। यार्सा संकलन गर्न दार्चुलाबाहेक अन्य जिल्लाबाट पनि सर्वसाधारण सो क्षेत्रमा पुगेका थिए।