माओवादी-एस कोटाका राजदूत फिर्ता बोलाइँदै, मिल्यो ओली-देउवा भागबन्डा

काठमाडौँ- प्रधानमन्त्री केपी शर्मा ओलीको नेतृत्वमा सरकार बनेको सरकारले माओवादी र नेकपा एकीकत समाजवादीको कोटामा राजदूत बनेर गएकाहरूलाई फिर्ता बोलाउने तयारी गरेको छ।

यसअघि तत्कालीन प्रधानमन्त्री पुष्पकमल दाहाल नेतृत्वको सरकारले कांग्रेसको कोटामा पठाइएका राजदूतहरूलाई फिर्ता बोलाएकाले त्यसको पैँचो तिर्न माओवादी-एसको कोटाका राजदूतलाई फिर्ता गराउने तयारी सरकारले गरेको हो।

कांग्रेस-एमाले गठबन्धन सरकार बनेको दुई सातामै सरकारले विपक्षी दलको कोटाका राजदूत फिर्ता गराउने प्रक्रिया सुरु गरेका हुन्।

प्रधानमन्त्री ओली र नेपाली कांग्रेसका सभापति शेरबहादुर देउवाबीच राजदूत नियुक्तिमा सहमति बनेको हो।

हाल चीनमा माओवादी कोटाका विष्णुपुकार श्रेष्ठ राजदूत छन्। रुसमा नेकपा एसको कोटाका मिलनराज तुलाधर राजदूत छन्। यी दुवैलाई फिर्ता बोलाएर भागबन्डामा नयाँ राजदूत पठाउन लागिएको हो। एस कोटाकै अस्ट्रेलिया राजदूत कैलाशराज पोखरेललाई पनि फिर्ता बोलाउने तयारी ओली सरकारको छ।

उच्च नेतृत्व तहमा भएको सहमति अनुसार अमेरिका, चीन, बेलायत र रुसमा एमालेले राजदूत सिफारिस गर्नेछ। ४ शक्ति राष्ट्रमा एमाले राजदूत पठाउने कोटा पाएको हो।

भारत, जापान, अस्ट्रेलिया र मलेसियामा राजदूत पठाउने कोटा कांग्रेसले पाएको छ।

खाली रहेका अन्य देशमा पनि भाग मिलाएर राजदूत पठाउने कांग्रेस एमालेको तयारी छ। एमालेभन्दा कांग्रेसले एक कोटा बढी पाउने सहमति छ।

दुई वटा छिमेकीमध्ये एमालेको कोटाका राजदूत चीन र कांग्रेस कोटाका राजदूत भारत जानेछन्। लामो समयदेखि चीनमा कम्युनिस्ट कोटाका राजदूत बन्दै आएका छन्।

भारत, अमेरिका र बेलायतस्थित राजदूतहरूलाई प्रचण्ड सरकारले नै फिर्ता बोलाएको थियो।