बागमतीमा बढ्यो राजस्व

हेटौँडा- बागमती प्रेदशमा राजस्व संकलन वृद्धि भएको छ। अघिल्लो आर्थिक वर्ष ०७९/०८० को तुलनामा गत आर्थिक वर्ष २०८०/८१ मा ४.७२ प्रतिशतले राजस्व संकलनमा वृद्धि भएको हो।

बागमती प्रदेश आर्थिक मामिला तथा योजना मन्त्रालयका तथ्यांकअनुसार आर्थिक वर्ष ०८०/८१ मा २५ अर्ब ५० करोड ४२ लाख संकलन भएको हो।

बागमती सरकारले आर्थिक वर्ष ०७९/८० मा २४ अर्ब ३५ करोड ४२ लाख राजस्व संकलन गरेको थियो। अघिल्लो आवभन्दा गत आर्थिक वर्ष ०८०/८१ मा एक अर्ब १५ करोडभन्दा बढी राजस्व संकलन गर्न सफल भएको हो।

बागमती प्रदेश सरकार अन्तरगत कोष तथा लेखा नियन्त्रक कार्यालय प्रमुख हरिप्रसाद उपाध्यायले लक्ष्य अनुसार नै राजस्व संकलन भएको जानकारी दिए।

‘घरजग्गा रजिस्ट्रेसन (मालपोत) र सवारीसाधन करमा केही कमी आएको छ। आर्थिक तरलताका कारण घरजग्गा तथा नयाँ सवारीसाधन खरिदबिक्रीमा सोचे जस्तो राजस्व सङ्कलन नभएतापनि तुलनात्मक रुपमा गत आर्थिक वर्ष भन्दा ४.७२ प्रतिशत वृद्धि हुनु भनेको सन्तोषजनक नै हो,’ उपाध्यायले भने।

प्रदेश सरकारको आर्थिक मामिला तथा योजना मन्त्रीको रुपमा कुन्दनराज काफ्लेले जिम्मेवारी सम्हालेपछि राजस्व संकलनमा सकारात्मक प्रगति भएको मन्त्रालयका एक कर्मचारीले बताए।

मन्त्रालयको तथ्याङ्क अनुसार मालपोत र सवारीसाधन शीर्षकबाट आर्थिक वर्ष २०८०/८१ मा रु १४ अर्ब राजस्व सङ्कलन हुने अनुमान गरिएकामा रु ११ अर्ब ६० करोड ७६ लाख ५० हजार मात्र राजस्व सङ्कलन भएको जनाएको छ।

घरजग्गा रजिस्ट्रेसन शीर्षकबाट ६ अर्ब ७५ करोड राजस्व सङ्कलन गर्ने लक्ष्य रहेकामा ८१.३२ प्रतिशत अर्थात् रु ५ अर्ब ४८ करोड ९३ लाख ३८ हजार राजस्व सङ्कलन भएको छ।

यस्तो छ राजस्व संकलनको अवस्था