आईएसपीलाई प्राधिकरणको निर्देशन : टिकटक चल्ने बनाउनू

काठमाडौँ- नेपाल दूरसञ्चार प्राधिकरणले बसै इन्टरनेट सेवा प्रदायकलाई टिकटक चल्ने बनाउन निर्देशन दिएको छ। नेपाल दूरसञ्चार प्राधिकरणले सूचना जारी गर्दै टिकटकमाथिको प्रतिबन्ध हटाइएकाले चल्ने बनाउनका लागि निर्देशन जारी गरेको हो।

प्राधिकरणले अर्को निर्णय नहुँदासम्मको लागि टिकटकमा लगाइएको प्रतिबन्ध हटाइएको जानकारी गराएको हो।

‘अर्को निर्णय नहुँदासम्मको लागि टिकटकमा लगाईएको रोक हटाउन दूरसंचार ऐन, २०५३ को दफा १५ ले दिएको अधिकार प्रयोग गरी सम्बन्धित सवै इन्टरनेट सेवा प्रदायकहरु र मोवाइल सेवा प्रदायकहरुलाई प्राधिकरणबाट निर्देशन जारी गरिएको छ,’ प्राधिकरणले भनेको छ।

मन्त्रिपरिषद्‌ बैठकले २०८१ भदौ ६ गते टिकटमाथि लगाइएको प्रतिबन्धन हटाउने निर्णय गरेको थियो।

गत वर्ष असोज २७ गते नेपाली समाजको सामाजिक सद्भाव बिगारेको भन्दै पुष्पकमल दाहाल प्रचण्ड नेतृत्वको सरकारले नेपालभर टिकटक चल्न नदिने निर्णय गरेको थियो। तर सरकारको निर्णय पुनर्विचारका गर्न चिनियाँ पक्षले सरकारलाई आग्रह गर्दै आएको थियो।

सामाजिक सद्भाव खल्बल्याउन प्रेरित गरेको भन्दै माओवादी केन्द्रका अध्यक्ष पुष्पकमल दाहाल प्रचण्ड नेतृत्वको सरकार टिकटक बन्द गरेको थियो। टिकटक बन्द गर्दा अभिव्यक्ति स्वतन्त्रतामाथि संकुचन गर्न खोजेको आरोप सरकारमाथि लागेको थियो।

टिकटकले पटकपटक आफूहरु नेपालमा दर्ता भएर सञ्चालनमा आउन तयार रहेको र नेपालको कानुन मान्न तयार रहेको बताएपछि टिकटकमाथिको प्रतिबन्ध खुलाइएको हो।

टिकटकमाथिको प्रतिबन्ध हटाउने विषयमा प्रधानमन्त्री केपी शर्मा ओलीले सत्ता साझेदार नेपाली कांग्रेससँग पनि छलफल गरेका थिए। टिकटक खुलाउने विषयमा कांग्रेस सकारात्मक देखिएपछि प्रतिबन्ध हटाएको हो।