सांसदको प्रश्नः भ्रष्टचारीलाई जोगाइरहने, काण्डैकाण्ड गरिरहने अनि देश डुबाइरहने ?

काठमाडौं – राष्ट्रिय स्वतन्त्र पार्टीकी सांसद डा. तोसिमा कार्कीले सांसदमा बोल्दै भ्रष्टाचारमा कहाँ लिंग जोडिएको हुन्छ भन्दै प्रश्न गरेकी छन्। मंगलबार बसेको प्रतिनिधिसभा बैठकमा सांसद कार्कीले नेपाली कांग्रेसकी सांसद आरजु राणा देउवातर्फ इंगित गर्दै भ्रष्टाचारमा कहाँ लिंग जोडिएको हुन्छ ? भन्दै प्रश्न गरेकी हुन्।

‘एक महिला माननीयज्यूले भन्नुभयो टेप काण्डको अनुसन्धान माग गर्दा महिला विद्रोही भयो, महिला हिंसा भयो। मलाई उत्तर दिनुपर्‍यो। भ्रष्टाचारमा कहाँ लिङ्ग जोडिएको हुन्छ भ्रष्टाचारीमात्र होइन यहाँ चिनारी फेरेर राष्ट्रघात भएको छ। अपराध भएको छ कारबाही हुनुपर्छ,’ सांसद आरजु राणा देउवालाई इङगीत गर्दै उनले भनिन्।

गएको बैसाख २४ गते सार्वजनिक भएको टेप प्रकरणमा पूर्व प्रधानमन्त्री पत्नी आरजुलगायतका केही व्यक्तिलाई ठूलो रकम खुस दिइएको बताइएको थियो। गएको आइतबारको दिनमा आजुले संसदमा त्यसको खण्डन गरेकी थिइन्।

संसदकै अघिल्लो दिनको बैठकमा बोल्दै सांसद आरजुले महिलाले राजनीति गरेको देखेर पुरुषवादी समाज तर्सिएको भन्दै भ्रष्टाचारजस्तो विषयको आरोप आफूले खप्नुपरेको जनाएकी थिइन्।

‘भ्रष्टाचारको कुरामा हामी साँच्चिकै कति गम्भीर छौं भन्ने मेरो ठूलो प्रश्न छ। म नभएको दिनमा मेरो नामलाई इंगित गरेर अनेक थरि प्रश्न उठेको छ र आज पनि प्रश्न उठेको पाएको छु,’ प्रतिनिधि सभाको बैठकमा उनले भनेकी थिइन्, ‘एउटा नारीले आफ्नो हैसियतमा राजनीति गरेको यो देशमा सैह्य हुँदैन रहेछ। पुरूषले भनेको ठाउँमा मात्र नारी बस्नुपर्ने, उनीहरूले भनेको भाष्य मात्रै हामीले बोल्नुपर्ने, उनीहरूले भनेको मात्र हामीले अभ्यास गर्नुपर्ने। त्योभन्दा अलिकति सार्वजनिक जीवनमा आयो भने पुरूषहरूलाई त्यो असैह्य हुने। योचाहिँ परिस्थिति बनेको छ। जसले जति आलोचना गरे पनि मैले बिराएको छैन, म डराउन्नँ।’

‘केही माननीयहरूले सदनको दुरुपयोग गर्नुभएको छ। संसद्‍मा कोही नांगिएर परेड खेल्ने, कोही मौन धारणा गर्ने। संसद्‍मा सांसदहरू मर्यादित नबन्दा आम नागरिक, सदन, सरकार र आफैं पनि अमर्यादित हुने हेक्का राख्नुपर्छ।’

कार्कीले नक्कली भुटानी शरणार्थी प्रकरणमा देशका ठूला निकाय र राजनेताहरुनै संलग्न रहेको आरोप लगाउँदै अनुसन्धान र कारबाही अगाडि बढाउनुपर्ने बताएकी छन्।

‘मेरो प्रश्न छ–यो सदन देश निर्माणका लागि छलफल गर्ने ठाउँ हो कि एक भ्रष्टाचारीले अर्को भ्रष्टाचारीलाई जोगाउने प्रहसनस्थल हो ? नेपाली नागरिकलाई भुटानी शरणार्थी बनाएर विदेश लैजाने काममा देशका ठूलाठूला निकाय र नेताहरु संलग्न भएको कुरा बाहिर आइरहेको छ,’ कार्कीले भनिन्, ‘प्रहरीद्वारा पक्राउ पूर्जी जारी गर्दासमेत राज्यले नै जोगाउन खोजिएको छ। एकले अर्कालाई जोगाइरहने, काण्डैकाण्ड गरिरहने अनि देश डुबाइरहने ? अन्तर्राष्ट्रिय जगतमा राष्ट्रलाई नै दलाल स्थापित गराउने अनि के मुखले अनुदान माग्न जाने ?’

नेकपा माओवादी केन्द्रकी सांसद दुर्गा राईले प्रतिनिधिसभाको बैठक मजाक गर्ने थलोको रुपमा दुरुपयोग हुन थालेको भन्दै चिन्ता प्रकट गरेकी छन्।

प्रतिनिधिसभाको शून्य समयमा बोल्दै उनले सदनको गरिमालाई मर्यादित बनाउनु सबै सांसदको कर्तव्य, दायित्व र जिम्मेवारीको विषय भएको बताइन्।

‘तर हाम्रा प्रस्तुति र गतिविधिहरु त्यति वाञ्छनीय देखिँदैनन्। सदन सिंगो मुलुकको भविष्य निर्माण गर्ने ठाउँ हो तर, यसलाई केही माननीयहरुले मजाक गर्ने थलोको रुपमा दुरुपयोग गर्नुभएको छ’, उनले भनेकी छन्।

यसअघि अमरेश कुमार सिंह लगायतका सांसदहरूले संसद्‍मा प्रस्तुत गरेका शैलीप्रति लक्षित गर्दै उनले भनिन्, ‘केही माननीयहरूले सदनको दुरुपयोग गर्नुभएको छ। संसद्‍मा कोही नांगिएर परेड खेल्ने, कोही मौन धारणा गर्ने। म सदनलाई मर्यादित बनाउन सभामुखमार्फत् ध्यानाकर्षण गराउन चाहान्छु । संसद्‍मा सांसदहरू मर्यादित नबन्दा आम नागरिक, सदन, सरकार र आफैं पनि अमर्यादित हुने हेक्का राख्नुपर्छ।’

नेपाली कांग्रेसका नेता प्रदीप पौडेलले अन्तर मन्त्रालय समन्वय नहुँदा काठमाडौंको सडक पटक पटक भत्काउनु परेको बताएका छन्।

सङ्घीय संसद् भवन नयाँ बानेश्वरमा मङ्गलबार बसेको प्रतिनिधिसभा बैठकको शून्य समयमा मन्तव्य राख्नुहुँदै सांसद प्रदीप पौडेल। तस्बिर: चन्द्रकला क्षेत्री/रासस

प्रतिनिधि सभाको बैठकमा शून्य समयमा बोल्ने क्रममा उनले काठमाडौंका धेरै जसो सडकको निर्माण कार्य अलपत्र परेको सुनाए।

‘खानेपानीको पाइप विछ्याउनेदेखि विजुलीको तार भूमिगत गर्ने नाममा सडक बारम्बार खनिएको छ,’ पौडेलले भने, ‘फुटपाथमा निर्माण सामग्री राखेर अस्तव्यस्त बनाइएको छ । सरकारका मन्त्रालयहरु विच समन्वय हुन नसकेका कारण एउटै सडक वर्षमा चारपटक सडक भत्काइएको छ।’

राष्ट्रिय स्वतन्त्र पार्टीको सांसद निशा डाँगीले लोकसेवा आयोगका विभिन्न पदमा आवेदन दिने परीक्षार्थीका तथ्यांक सुरक्षित नराख्ने अधिकारीहरूलाई कारबाही गर्न सरकारसँग माग गरेकी छन्। प्रतिनिधिसभाको बैठकमा सांसद डाँगीले विश्वमा प्रविधिले फड्को मरिरहँदा हाम्रो सरकारले भने चार लाख आवेदकको डाटा पनि सुरक्षित राख्न नसकेको भनी आलोचना गरेकी छन्।

‘२०७९ सालको मंसिर, पुस र माघ महिनामा लोकसेवा आयोगमा दरखास्त दिएका झन्डै चार लाख आवेदकको डेटा हराएको छ। डेटा पुनः प्राप्तिको प्रयास गरेको दुई महिनाभन्दा बढी भइसक्दा पनि डेटा रिकभर नभएपछि लाजमर्दो तरिकाले आयोगले पुनः दरखास्त आह्वान गरेको छ। विश्वमा प्रविधिले यस्तो फड्को मारिरहँदा हाम्रो सरकारले चार लाख आवेदकको डेटा सुरक्षित राख्न सकिरहेको छैन,’ उनको माग थियो, ‘डेटा रिकभर हुँदैन भने जिम्मेवार निकायमा बसेकालाई कारबाही गरियोस।’