फेरि पनि ट्रम्पको हत्या प्रयास!

फ्लोरिडा (अमेरिका)– अमेरिकी खुफिया संस्था फेडरल ब्युरो अप इन्भेस्टिगेसन (एफबीआई)ले अमेरिकाका पूर्वराष्ट्रपति डोनाल्ड ट्रम्पको हत्या गर्ने नियतका साथ आक्रमणको प्रयास भएको बताएको छ।

घटनामा संलग्न एक जनालाई हिरासतमा राखिएको ब्युरोका अधिकारीहरूले पुष्टि गरेका छन्।

फ्लोरिडाको एक गल्फ कोर्समा ट्रम्पको हत्या प्रयास भएको हो।

अधिकारीहरूका अनुसार सेक्रेट सर्भिसका एजेन्टले झाडीमा राइफल देखेका थिए। यसपछि एजेन्टले ती व्यक्तिमाथि गोली हानेका थिए।

एफबीआईका अनुसार त्यसबेला ट्रम्प २७५ देखि ४५५ मिटर टाढा थिए।

घटनास्थलबाट एके-४७ जस्तै देखिने हतियार, स्कोप, दुईवटा झोला र गोप्रो क्यामेरा पनि बरामद भएको छ।

एजेन्टले उनीमाथि पटक–पटक गोली हानेपछि झाडीबाट ती शंकास्पद व्यक्ति निस्किएको प्रत्यक्षदर्शीहरुले बताएका छन्। त्यसलगत्तै उनी कालो निसान कारमा देखिएका थिए। र, छिनमै अलप भए।

एउटा जना प्रत्यक्षदर्शीले नम्बर प्लेटसहित कारको तस्बिर खिचेका थिए। उक्त कार पछि मार्टिन काउन्टी क्लबको उत्तरी भागमा रोकियो।

‘यो कुरा हामीले मार्टिन काउन्टी शेरिफको कार्यालयलाई भनिसकेका थियौँ,’ पामबिच काउन्टीका शेरिफ रिक ब्राडशाले भने, ‘गाडी देख्नेबित्तिकै उक्त व्यक्तिलाई हिरासतमा लिइयो।’

त्यसपछि अधिकारीले प्रत्यक्षदर्शीसँग सोधपुछ गरेका थिए। उनीहरूको सोधपुछबाट पक्राउ परेका व्यक्ति र झाडीबाट निस्केर कारमा भागेको व्यक्ति एकै भएको पत्ता लाग्यो।

घटनापछि डोनाल्ड ट्रम्पले आफ्ना समर्थकहरूलाई इमेलमार्फत आफू सुरक्षित रहेको बताएका छन्।

ट्रम्पले भने, ‘मेरो गतिलाई कसैले रोक्न सक्दैन। म कहिल्यै हार मानेर छोड्दिनँ।’

सेक्रेट सर्भिस (गोप्य सेवा)ले यो विषयमा अनुसन्धान भइरहेको बताएको छ।

गोल्फ कोर्समा उपस्थित गोप्य सेवा एजेन्टले गजब काम गरेको शेरिफ ब्राडशाले बताए।

‘ट्रम्प जान चाहेको ठाउँमा सिक्रेट सर्भिसका एजेन्टले पहिल्यै पुगिसकेका हुन्छन्,’ उनले भने, ‘त्यही भएर उसले राइफल देखेर कारबाही गर्न सकेको थियो।’

डोनाल्ड ट्रम्पले गल्फ खेल्ने ठाउँलाई ट्रम्प अन्तर्राष्ट्रिय गल्फ कोर्स भनिन्छ।

अमेरिकी राष्ट्रपतिको कार्यालयले राष्ट्रपति जो बाइडेन र उपराष्ट्रपति कमला ह्यारिसलाई घटनाबारे जानकारी गराएको बताएको छ।

‘ट्रम्प सुरक्षित रहेकोमा राष्ट्रपति र उपराष्ट्रपतिलाई राहत मिलेको छ,’ ह्वाइटहाउसले भनेको छ।

घटनापछि कमला ह्यारिसले सामाजिक सञ्जालमा लेख्दै भनेकी छन्- अमेरिकामा हिंसाका लागि कुनै स्थान छैन।

बाइडेनले पनि उस्तै प्रकारको अभिव्यक्ति दिएका छन्। ‘मैले पहिले पनि धेरै पटक भनेको छु कि देशमा राजनीतिक हिंसा वा कुनै पनि प्रकारको हिंसाको कुनै स्थान छैन,’बाइडनले भेनका छन्।

रिपब्लिकन पार्टीबाट ट्रम्पका उपराष्ट्रपति पदका उम्मेदवार जेडी भान्सले भने, ‘यो खबर आउनुभन्दा केही समयअघि मात्र मैले ट्रम्पसँग कुरा गरेको थिएँ।उनी पूर्णरुपमा ठीक थिए। अहिले धेरै थाहा छैन। म आज राती मेरा बच्चाहरूलाई अझै जोडसँग अंकमाल गर्नेछु। र भगवानलाई धन्यवाद दिनेछु।’

ट्रम्पमाथि आक्रमणको प्रयास भएको थाहा पाएपछि उनका समर्थकहरूले फ्लोरिडास्थित उनको घरबाहिर जुलुस निकालेका छन्।

जुलाई १३ मा पेन्सिलभेनियाको चुनावी र्‍यालीमा पनि ट्रम्पमाथि आक्रमण भएको थियो। ट्रम्प कान छेडेर गोली बाहिर निस्किएको थियो।

ट्रम्पको कानबाट रगत बगिरहेको फोटोमा देखिन्थ्यो।

र्‍यालीस्थल नजिकैको छतबाट ट्रम्पमाथि गोली हानिएको थियो। उनीमाथि आक्रमण गर्ने व्यक्ति २० वर्षीय थोमस म्याथ्यू क्रक्स थिए। यसपछि सेक्रेट सर्भिसका स्नाइपरले गोली मारेका थिए।

यो घटनापछि सेक्रेट सर्भिसका विषयमा धेरै प्रश्न उठेका छन्। अमेरिकी पूर्वराष्ट्रपति डोनाल्ड ट्रम्पको सुरक्षामा खटिएका प्रहरीले आक्रमणकारीलाई कसरी यति नजिकसम्म आउन दिए भन्ने प्रश्न पनि उठेको छ।

थोमसले १३० मिटर टाढाबाट ट्रम्पलाई निशाना बनाएर फायर गरेका थिए।

घटनाको दुई हप्तापछि सेक्रेट सर्भिससका निर्देशक किम्बर्ली चिटलले राजीनामा दिनुपरेको थियो।