अधिवेशनभर ४ सांसद ‘गायब’, यी हुन् १० भन्दा बढी बैठकमा नजाने सांसद

काठमाडौँ– प्रतिनिधि सभाको बजेट अधिवेशनभर ४ जना सांसद संसदमा उनुपस्थित भएका छन्।

सभामुख देवराज घिमिरेले संसद्को बजेट अधिवेशनभर ४ जना सांसद अनुपस्थित भएको बताएका हुन्।

यो अवधिमा ५३ दिनमा ५६ वटा बैठक बसेका थिए।

राष्ट्रिय प्रजातन्त्र पार्टी (राप्रपा) का दीपक बोहोरा, नेपाली कांग्रेसकी सांसद अम्बिका बस्नेत र मनोरमा शेरचन र नेकपा (एमाले)का वसन्तकुमार नेम्वाङ अधिवेशनका कुनै पनि बैठकमा गएनन्। उनीहरू स्वास्थ्य समस्याका कारण बैठकमा उपस्थित हुन नसकेको सभामुख घिमिरले बताए।

यो अधिवेशनमा १४ जना सांसदहरू १० बैठकभन्दा बढी अनुपस्थित भएको उनले जानकारी गराए।

गीता बस्नेत ४७ बैठकमा अनुपस्थित हुँदा कालुराम राई १८ बैठकमा गएनन्।

सहरी विकासमन्त्रीसमेत रहेका प्रकाशमान सिंह १७ बैठकमा गएनन्। पूर्वपरराष्ट्रमन्त्री नारायण खड्का १६ बैठकमा गएनन्।

यस्तै, राजु थापा १० बैठकमा गएनन् भने डा. सुनीलकुमार शर्मा ११ बैठकमा गएनन्।

कान्तिका सेजुवाल १५ बैठक अनुपस्थित हुँदा प्रेमबहादुर महर्जन १० बैठकमा गएनन्।

गोकर्णराज विष्ट १२ बैठक र नारायणप्रकाश साउद १० बैठकमा अनुपस्थित रहेको सचिवालयले जनाएको छ।

२०८१ वैशाख २८ गते मङ्गलबार सुरु भएको अधिवेशन १३० दिन चलेको थियो।

‘जम्मा २०६ घण्टा २५ मिनेट संसदीय काम कारबाहीमा व्यतीत गरियो,’ उनले भने, ‘त्यसमा दुवै सदनको बैठकमा २ पटक बस्यो, जसमा ३ घण्टा ५५ मिनेट व्यतीत भयो।’

सङ्घीय संसद्को बजेट अधिवेशन सोमबार (आज) राति १२ बजेबाट अन्त्य हुँदैछ।

सरकारको सिफारिसअनुरूप राष्ट्रपति रामचन्द्र पौडेलले अधिवेशन अन्त्य गरिसकेका छन्।