हेटौँडामा भेटियो करोडौँको सुन, यस्तो छ तस्करको नयाँ शैली

हेटौँडा- हेटौंडाबाट ८ किलोग्राम २४३ ग्राम ९७० मिलिग्राम सुन बरामद भएको छ। सुनसहित दुई भारतीय पनि पक्राउ परेका छन्।

शनिबार (आज) बिहान ३ बजेको समयमा प्रहरीले सुनसहित भारतीयलाई पक्राउ गरेको हो।

उक्त सुन नेपाली नम्बर प्लेट भएको स्कुटरबाट बरामद भएको हो। स्कुटर चालक र पछाडि बसेका व्यक्ति पनि भारतीय नागरिक नै हुन्।

पथलैयाबाट हेटौँडातर्फ आउँदै गरेको बागमती प्रदेश ०२-०४७ प ७५०३ नम्बरको स्कुटरलाई जाँच गर्दा ठूलो परिणाममा सुन फेला परेको थियो।

उक्त स्थान हेटौँडा उपमहानगरपालिका-१५ रातोमाटे चेकपोस्ट नजिकै पर्छ।

बरामद सुनको मूल्य ११ करोड ४३ लाख ५७ हजार ८७८ रुपैयाँ ६५० रूपैयाँ बराबर छ।

जिल्ला प्रहरी कार्यालय मकवानपुरका प्रहरी प्रमुख उपरीक्षक विश्वराज खड्काको कमान्डर खटिएको प्रहरी टोलीले उनीहरू चढेको स्कुटर जाँच गरेको थियो।

पक्राउ पर्नेमा भारतको महाराष्ट्र राज्य सांगली जिल्ला दिंघची थाना पुजरबाडीका २५ वर्षका अभिषेक अजिनाथ र २७ वर्षका राहुल भिट्टिहाल बाड छन्।

बरामद सामग्री।

प्रहरी उपरीक्षक खड्काका अनुसार पक्राउ परेका दुवै जना यसअघि पनि सुन कारोबारमा संलग्न रहेको बुझिएको छ।

‘उनीहरू यसअघि पनि सुन तस्करीमा संलग्न भएको हुन सक्ने आधारबारे हामीले अनुसन्धान गरिरहेका छौँ,’ उनले भने, ‘तस्करीका शृंखला पछ्याउँदा उनीहरूको गिरोह ठूलो हुन सक्छ। यो विषयमा अनुसन्धान हुन्छ।’

उनीहरूले यसअघि असोज ८ गते दुई किलो सुन काठमाडौँमा पुर्‍याएको प्रारभ्मिक अनुसन्धानबाट खुलेको छ। उनीहरूले विदेशीको एजेन्टका रूपमा सुन तस्करीमा संलग्न भएको हुन सक्ने प्रहरीको आशंका छ।

उनीहरूको शरीरमा रुमालले बेरेर सुनको बिस्कुट राखेका थिए। ८ थान बिस्कुटमा उक्त मात्राको सुन फेला परेको हो। उनीहरुले टेपको सहायताले बाँधेर शरीर बाँधर सुन अड्काएका थिए।

जनकपुरबाट सुन लिएर उनीहरू पथलैयासम्म बसमै आएका थिए। पथलैयाबाट भने स्कुटरमा हेटौँडातर्फ आउँदै गरेका थिए।

बरामद भएको सुन र पक्राउ परेका दुवै जनालाई थप राजश्व अनुसन्धान कार्यालय पथलैया पठाइनेछ।

गत मंगलबार पनि हेटौंडा उपमहानगरपालिका वडा–१५, रातोमाटे चेकपोस्टबाटै एक भारतीय सुनसहित पक्राउ परेका थिए। बिहान करिब १० बजे वीरगञ्जबाट हेटौँडातर्फ आउँदै गरेको वा.प्र.०३–००१ ज ६९६ नम्बर यात्रुबाहक ईभी माइक्रोका यात्री चेक गर्दा सुन फेला परेको थियो। भारतको बिहार राज्य फूलबरिया पूर्वी चम्पारण बरेवा बस्ने वर्ष ३४ का सुजित सर्राफलाई प्रहरीले शंका गरी जाँच गरेको थियो।

सुजितको शरीर तथा झोला खानतलासी गर्दा खुट्टाको पैतालामा टेपले बेरेर सुन लुकाएका थिए। उनको साथबाट सुनको बिस्कुटको आकारका टुक्रा ४ थान, बिस्कुटको सानो टुक्रा १ थान, सिक्री १ थान गरी ४९० ग्राम ८८० मिलिग्राम (करिब ६७ लाख ३४ हजार ५ सय ४४ रुपियाँ मूल्य बराबर) को सुन फेला परेको थियो। उक्त सुनसहित सर्राफलाई राजस्व अनुसन्धान कार्यालय पथलैया पठाइएको छ।