४ मन्त्री थपिएपछि गण्डकी सरकारले पायो पूर्णता, चौथो पटक मन्त्री बने दीपक मनाङे

पोखरा- गण्डकी प्रदेश सरकारले पूर्णता पाएको छ। अन्तिम समयमा आएर स्वतन्त्र रूपमा निर्वाचित भएर नेकपा एसमा प्रवेश गरेका सांसद दीपक मनाङे भनिने राजीव गुरुङ पनि मन्त्री बनेपछि मुख्यमन्त्री सुरेन्द्र पाण्डेको मन्त्रिपरिषद्ले पूर्णता पाएको हो।

शुक्रबार मात्रै नेपाली कांग्रेसका दुई जना, नेकपा माओवादी केन्द्रका एक जना र नेकपा एसका एक जना थपिएपछि ७ सदस्यीय मन्त्रिरिषद् बनेको हो। सुरेन्द्रराज पाण्डेले कांग्रेसका महेन्द्रध्वज जिसी र दीपेन्द्रबहादुर थापालाई मन्त्री बनाएका छन् भने माओवादीबाट रेश्मबहादुर जुग्जाली मन्त्री बनेका छन्। नवनियुक्त मन्त्रीको शपथ शुक्रबारै हुने तय छ। नयाँ मन्त्रीले पाउने मन्त्रालयको आधिकारिक जानकारी दिइएको छैन।

एमालेका खगराज अधिकारी नेतृत्वको सरकार ढलेपछि कांग्रेस–माओवादीसहितको गठबन्धनबाट पाण्डे गत वैशाख १४ गते मुख्यमन्त्री बनेका थिए। त्यसबेला उनले कांग्रेसबाट सरस्वती अर्याल तिवारी र माओवादीबाट सुशीला सिम्खडालाई विना विभागीय मन्त्री बनाइएको थियो।

मनाङे चौथो पटक मन्त्री बनेका हुन्। नवलपुरका जिसी यसअघि मुख्यमन्त्रीका दाबेदार थिए। माओवादीका जुग्जाली अघिल्लो सरकारमा पनि पर्यटनमन्त्री थिए। यसअघि १२ सदस्यीय रहेको मन्त्रिपरिषद एमालेका मुख्यमन्त्री अधिकारीले ७ मा झारेका थिए। नयाँ मुख्यमन्त्रीले पनि त्यसलाई नै निरन्तरता दिएका हुन्।