नवलपुरमा जग्गा नापजाँच धमाधम

त्रिवेणी– भूमिसम्बन्धी समस्या समाधानका लागि नवलपरासीको पूर्व नवलपुरमा जग्गा नापीको कामले गति लिन थालेको छ। भूमिहीन दलित, भूमिहीन सुकुम्बासी र अव्यवस्थित बसोबासीको समस्या समाधानका लागि यहाँ रहेका पालिकामा जग्गा नापीको कामले गति लिन थालेको हो।

नवलपुरका आठ वटा पालिकामध्ये हाल तीन वटा पालिकामा जग्गा नापीको काम भइरहेको छ। भूमिसम्बन्धी समस्या समाधान आयोगका जिल्ला सदस्य राम तामाङका अनुसार कावासोती नगरपालिका, मध्यबिन्दु नगरपालिका र हुप्सेकोट गाउँपालिकामा जग्गा नापीको काम जारी छ।

नवलपुरको देवचुली नगरपालिका, गैँडाकोट नगरपालिका र विनयी त्रिवेणी गाउँपालिकामा प्राप्त आवेदनमा अनलाइन ‘इन्ट्री’को काम चलिरहेको छ। यीमध्ये देवचुली र गैंडाकोटको काम करिब अन्तिम चरणमा रहेकाले चाँडै जग्गा नापीको काम सुरु हुने जिल्ला सदस्य तामाङले बताए।

जिल्लाका पहाडी क्षेत्रमा पर्ने पालिका बौदीकाली र बुलिङटारमा भने भूमिसम्बन्धी समस्या समाधानको काम अघि बढाउने गरी सम्झौताको काम सकिएको र चाँडै रहे पनि थप आवश्यक कार्य अघि बढ्ने उनको भनाइ छ।

‘सबैजसो पालिकामा भूमिसम्बन्धी समस्या समाधानका लागि आवश्यक काम अघि बढेका छन्। केही पालिकामा नापीकै काम चलिरहेको छ। यही गतिमा काम अघि बढे केही वडामा अबको एक महिनामा पुर्जा दिन सकिन्छ’, जिल्ला सदस्य तामाङले भने।

नवलपुरमा प्रारम्भिक तथ्यांकअनुसार करिब ३० हजार आवेदन परेका छन्। सबै पालिकाले प्राप्त आवेदनलाई अनलाइन इन्ट्रीको काम सके यकिन तथ्यांक आउने उनले बताए।
शुक्रबार मात्रै कावासोती नगरपालिकाले जग्गा नापीको कामलाई अघि बढाएको छ। नगरपालिकाको वडा नम्बर १ र ४ बाट जग्गा नापीको काम सुरु भएको नगर प्रमुख विष्णुप्रसाद भुसालले बताए।

पालिकामा अघिल्लो आयोगका समय केही वडामा नापीको काम भएको थियो। हालको आयोगले सोही प्रक्रियालाई स्वामित्व लिएपछि नयाँ वडाबाट थप नापीको काम सुरु गरिएको नगर प्रमुख भुसालको भनाइ छ।

जग्गाको समस्या चाँडो समाधान गर्न आवश्यक रहेको उनको धारणा छ। वर्षौंदेखि भूमिहीन सुकुम्बासीका रुपमा रहेकालाई राज्यले एक पटकका लागि पुर्जा दिन लागेकाले यो कामलाई जतिसक्दो चाँडो सम्पन्न गरी भूमिहीन, सुकुम्बासीलाई जग्गाको मालिक बनाउने काममा सबैले सकारात्मक सहयोग गर्नुपर्ने उनले बताए।

कावासोती नगरपालिकाभित्र ७ हजार ५६७ जनाले आवेदन दिएका छन्। नगरपालिकामा ७०७ भूमिहीन दलित, १ हजार २५१ भूमिहीन सुकुम्बासी र पाँच हजार ६०९ अव्यवस्थित बसोबासीले आवेदन दिएका छन्। यीमध्ये सबै कम्प्युटर इन्ट्रीको काम सकिएको छ।

पालिकाभित्र यसअघि २ हजार ८६ कित्ताको नापीसमेत सकिएको छ। कावासोती नगरपालिका वडा नम्बर ३, ५, १०, १५ र १७ मा यसअघि नापी गरिएको छ।

तर, यी वडामा पूर्णरुपमा नापीको काम सम्पन्न हुन बाँकी छ। जग्गा नापीको काम सकिने वडामा क्रमशः फिल्डबुक तयार पार्ने, श्रेस्ता पुर्जा तयार पार्ने र पुर्जा वितरण काम हुने आयोगका जिल्ला सदस्य तामाङले बताए।