राष्ट्रपति कार्यालयको ट्विटर ह्यान्डल विद्या भण्डारीले गरिन् निजीकरण

काठमाडौं- निवर्तमान राष्ट्रपति विद्यादेवी भण्डारीले राष्ट्रपतिको अफिसियल ट्विटर ह्यान्डल निजीकरण गरेकी छन्। भण्डारी राष्ट्रपति भएका बेला राष्ट्रपतिको कार्यालयले आधिकारिक रुपमा प्रयोग गर्ने गरेको ट्विटर ह्यान्डल नै निजीकरण गरेकी हुन्।

भण्डारीले राष्ट्रपतिको पदावधि पूरा गरेपछि सोमबार रामचन्द्र पौडेलले राष्ट्रपतिका रूपमा शपथ ग्रहण गरेका थिए। योसँगै भण्डारी राष्ट्रपतिको निवास शीतलनिवासबाट बाहिरिएकी भण्डारीले ट्विटर ह्यान्डल पनि साथमै लगेकी हुन्।

सन् २०१८ को अप्रिलमा खोलिएको राष्ट्रपतिको ट्विटर ह्यान्डल (@PresidentofNP) लाई बिहीबार परिवर्तन गरेर (@BidyaDBhandari) बनाइएको छ। यसअघि भण्डारी राष्ट्रपति हुँदा चलाउने गरेको ह्यान्डल भने अर्कै व्यक्तिले प्रयोग गर्न थालिसकेको छ।

सरकारी उच्च पदमा बहाल भएका बेला सम्बन्धित कार्यालयले प्रयोग गर्ने सामाजिक सञ्जालका विवरण पनि राष्ट्रिय सम्पत्ति भएकाले पदबाट मुक्त भएसँगै उत्तराधिकारीलाई हस्तान्तरण गर्ने अन्तर्राष्ट्रिय प्रचलन छ। तर भण्डारीले भने त्यो परम्परालाई तोडेकी छन्।

राष्ट्रपति पौडेलको सचिवालयका अनुसार निवर्तमान राष्ट्रपतिले प्रयोग गर्दै आएको ह्यान्डल भण्डारीकै सचिवालयले बनाएको भन्दै फिर्ता गर्न इन्कार गरेको हो। ‘त्यो ह्यान्डल हामीले व्यक्तिगत रुपमा विद्यादेवी भण्डारीकै लागि खोलेका थियौँ। उहाँको कार्यकाल सकिएपनि भण्डारीकै सचिवालयले क्रियट गरेकाले उहाँको पदावधि सकिए पनि त्यसलाई  फिर्ता गर्न पर्दैन भनेर उहाँहरू (भण्डारी पक्ष)ले भन्नुभयो,’ पौडेलको सचिवालयले थप्यो, ‘अब राष्ट्रपति कार्यालयले राष्ट्रपतिको आधिकारिक ह्यान्डल क्रिएट गर्छ।’

भण्डारी राष्ट्रपति हुँदा सचिवालयमा रहेका टीका ढकालले राष्ट्रपतिको ट्विटर ह्यान्डलका विषयमा बोल्न चाहेनन्। ‘राष्ट्रपति कार्यालयको अफिसयल ह्यान्डलका बारेमा मलाई सोध्ने हो र यार? उताको कुरा उतै सोध्नुस्, मलाई नसोध्नुस्,’ उनले भने। राष्ट्रपतिको आधिकारिक ह्यान्डल भण्डारीले निजीकरण गरेपछि सामाजिक सञ्जालमा आलोचना भइरहेको छ।

यसअघि नेकपा एमाले अध्यक्ष केपी शर्मा ओली प्रधानमन्त्री हुँदा प्रधानमन्त्री कार्यालयको ट्विटर ह्यान्डल पनि हस्तान्तरण गरेका थिएनन्। त्यसपछि आएका प्रधानमन्त्री शेरबहादुर देउवाको सचिवालयले (PM_nepal_) नामक ट्विटर ह्यान्डल बनाएको थियो। देउवापछि प्रधानमन्त्री बनेका पुष्पकमल दाहाल ‘प्रचण्ड’ले यही ह्यान्डल चलाइरहेका छन्।

यसैबीच प्रधानमन्त्री दाहालले चलाउने ह्यान्डल पनि बिहीबार बिहान ह्याक भएको थियो। तर प्रधानमन्त्री कार्यकालयले ह्यान्डललाई फिर्ता ल्याइसकिएको जानकारी दिएको छ।