जेठमा चार फिल्म हलमा आउँदै

काठमाडौँ- व्यवसायका हिसाबले फड्को मार्न नसके पनि नेपाली फिल्म निर्माण पछिल्लो समय उत्साहजनक भइरहेको छ। वैशाख २९ गते रिलिज भएको फिल्म ‘हल्कारा’ सम्म आइपुग्दा वैशाख महिनामा ८ वटा फिल्म दर्शकमाझ आएका छन्। वैशाखमा ‘बिहे पास’, ‘बुलाकी’, ‘जारी’, ‘नाई नभन्नु ल-६’, ‘कैदीको पत्र’, ‘प्रसाद-२’, ‘आई एम ट्वान्टी वान’ र ‘हल्कारा’ फिल्म रिलिज भए।

हालसम्मको रिलिज क्यालेन्डरअनुसार जेठमा ४ फिल्म मात्र आउने देखिएको छ। ती फिल्म हुन् ‘डाकिनी’, ‘ए साथी सुन’, ‘टुल्की’ र ‘हुक्का : एन एब्सर्ड ड्रिम’।

चलचित्र निर्माता संघअनुसार यी फिल्म जेठको प्रत्येक साता एकएक गरी प्रदर्शनमा आउन लागेका भने होइनन्। चारमध्ये ‘डाकिनी’ र ‘ए साथी सुन’ जेठको पहिलो साता एकसाथ प्रदर्शनमा आउँदैछन् भने ‘टुल्की’ र ‘हुक्का : एन एब्सर्ड ड्रिम’ दोस्रो साता एक अर्कोसँग भिड्दैछन्।

यो वर्षको सुरुवातमा उपेन्द्र सुब्बाको निर्देशनमा तयार भएको फिल्म ‘जारी’ले राम्रो व्यापार गर्‍यो। फिल्म अहिले पनि हलमा चलिरहेको छ र दर्शकको राम्रो साथ पाइरहेको छ।

वैशाखामा प्रदर्शनमा आएका ‘जारी’बाहेकले राम्रो व्यापार गर्न सकेनन्। झन्डै १७ करोडको व्यापार गरिसकेको जारीले सबै फिल्मलाई पछि मात्र पारेन, फराकिलो अन्तरको व्यापार गर्‍यो।

जेठमा रिलिज चारै फिल्म नयाँ कथामा बनेका छन्। फिल्म ‘डाकिनी’ बौद्धग्रन्थमा बज्रयोगिनी, ताराजस्ता देवीका प्रशस्तै मिथक र दन्त्यकथा छन्, त्यस मध्येकै कथामा निर्माण भएको फिल्म हो। विश्वका प्रख्यात फेस्टिभलको चक्र पुरा गरेपछि नेपालमा रिलिज हुन लागेको यो फिल्मको अङग्रेजी नाम ‘लुकिङ फर अ लेडि विथ फ्याक्स एण्ड मुस्टाच’ नाम दिइएको छ।

६० प्रतिशत तिब्बती र ४० प्रतिशत नेपाली भाषाको प्रयोग भएको यो फिल्मको मुख्य भूमिकामा भियतनामका छिरिङ तासी र अमेरिकाबाट आएकी तेन्जिङ कुन्सेल छन्।

फिल्म ‘ए साथी सुन’ लभस्टेरी, थ्रिलर तथा कमेडी विधाको फिल्म हो। रमेश बानियाँ, अभिनेत्री वर्षा शिवाकोटी, आर्यन खड्का, सुशील पोखरेल, जयनन्द लामा लगायतको अभिनय रहेको फिल्म इभान इन्टरटेनमेन्टको प्रस्तुतिमा बिना कार्की र सन्तोषकुमार राईले बनाएका हुन्।

‘टुल्की’ हिमाली क्षेत्रमा प्रचलित बहुपतिप्रथामा आधारित फिल्म हो। द पाल्म ग्रुप प्रालिको ब्यानरमा निर्माण भएको फिल्म निर्माता शेखर लामा हुन्। देव थापाको निर्देशन रहेको फिल्ममा शिशिर वाङ्देल, स्वस्तिमा कार्की, सोफिया लिम्बू, नरेन्द्र तामाङ, सोम लामा, शेखर लामा, सौजन सुब्बा, भक्तसिंह कठायत, रत्नप्रसाद न्यौपाने लगायतका कलाकारको अभिनय छ।

‘हुक्काः एन एब्डर्स ड्रिम’ सामाजिक विषयमा निर्माण भएको फिल्म हो। स्पाइनी ब्याब्लर क्रियसनले ह्यासट्याग नेपालसँग सहकार्य गर्दै निमार्ण गरेको फिल्ममा शम्भु थापाको निर्देशन छ। यसमा प्रमिला खनाल, सन्तोकुमार आत्रेय, प्रकाश घिमिरे, तेज गिरी, अंशु न्यौपाने, तलिशा गुरुङलगायतका कलाकारहरुका कलाकारको अभिनय छ। रेश्मा प्रधान सह निर्माता, पार्वती थापा, सुशील गुरुङ र सागर गोदार क्षेत्री निर्माता रहेको फिल्ममा कमलबहादुर भुजेल र किरणकुमार आत्रेय कार्यकारी निर्माता छन्।