कञ्चनपुरमा ३९ हजारले मात्रै लगाए कोरोनाविरुद्धको बुस्टर डोज

कञ्चनपुर– जिल्लामा कोरोना भाइरसविरुद्धको बुस्टर डोज अभियानका क्रममा हालसम्म ३९ हजार २५८ महिला तथा पुरुषले मात्रै बुस्टर डोज लगाएका छन्। जिल्ला स्वास्थ्य कार्यालय कञ्चनपुरका खोप प्रमुख जनक कँुवरले यहाँ ‘बुस्टर डोज’को पहिलो र दोस्रो मात्रा लगाइएको जानकारी दिए।

उनले भने, ‘९ वटै पालिकाका स्वास्थ्य संस्थाबाट कोरोनाविरुद्धको बुस्टर डोज लगाइयो। अहिलेसम्म चौथो खोप लगाउन फेरि पनि खोप आवश्यक भएकाले केन्द्रमा माग गरेका छौं।’
उनले खोप उपलब्ध भए आगामी जेठ दोस्रो सातापछि पुनः खोप अभियान सञ्चालन गर्ने योजना रहेको बताए।

यहाँ बुस्टरको पहिलो मात्रा सो अभियानका क्रममा १३ हजार ७५८ जनाले मात्रै लगाएको स्वास्थ्य कार्यालयको तथ्यांकले देखाएको छ। कोरोनाविरुद्धको खोप आइसकेपछि हालसम्म कञ्चनपुरमा ४ लाख ४५ हजार ४२ जनाले त्यसविरुद्धको खोप लगाइसकेका छन्।

त्यसैगरी ३ लाख ६४ हजार ७८५ जनाले दोस्रो मात्रा लगाएका छन् भने २ लाख १६ हजार ६६७ जनाले खोपको तेस्रो मात्रा लगाएको स्वास्थ्य कार्यालयले जनाएको छ। ‘भारतबाट आउनेको गड्डाचौकी नाकामा स्वास्थ्य जाँच भइरहे पनि नाकामै खोप लगाउन अभियान स्थगन छ’, खोप प्रमुख कुँवरले भने, ‘केन्द्रबाट नियमित खोप नआउनु र छिट्टै म्याद गुज्रिने खालका खोप आएकाले नियमित लगाउन नाकामा नसकिएको हो।’

उनले कोरोनाको पहिलो र दोस्रो लहरका बेला गड्डाचौकी नाकामै हेल्थ डेस्क सञ्चालन गरेर कोरोना जाँच र खोप अभियान चलाइएको जानकारी दिए। यहाँ खोप अभियानका क्रममा गत चैतमा ५५ वर्षमाथिका ज्येष्ठ नागरिक, गर्भवती, स्वास्थ्यकर्मी र रोग प्रतिरोधात्मक क्षमता कम भएकालाई बुस्टर डोजका रूपमा खोप दिइएको थियो।