हामीले अवस्था बदल्न सकेनौं, जनतामा निराशा पैदा भएको छ : प्रचण्ड

काठमाडौँ- प्रधानमन्त्री पुष्पकमल दाहाल प्रचण्डले जनतामा निराशा बढेको बताएका छन्। सोमबार पार्टी निकट निजामती कर्मचारी संगठनको कार्यक्रममा उनले यस्तो बताएका हुन्।

‘जनतामा निराशा पैदा भएको साँचो हो । हामीले व्यवस्था बदले पनि अवस्था बदल्न केन्द्रित हुन सकेनौं,’ प्रधानमन्त्री दाहालले भनेका छन्, ‘यसका लागि सबै क्षेत्रमा फड्को मार्ने किसिमले काम नगरी आम नागरिकको अवस्थामा परिवर्तन हुने देखिएको छैन।’

हरेक क्षेत्रमा आमूल सुधार चाहिएको बताएका उनले सामान्य सुधारले मात्र नपुग्ने उल्लेख गरे। ‘हरेक क्षेत्रमा र्‍याडिकल रिफर्म भन्न मन पराउछु म। आमुल सुधार। सामान्य सुधार होइन,’ उनले भने, ‘संरचनात्मक रुपान्तरणको आवश्यकता देखिएको छ।’

यस वर्षको बजेटबाट प्रभावकारी हुन नसकेका कार्यक्रम खारेज गरेर नयाँ कार्यक्रम ल्याउने पनि प्रचण्डको भनाइ छ। आगामी दिनमा लगानी र आर्थिक क्रियाकलाप बढ्ने भन्दै उनले आउँदो शरद ऋतुमा पर्यटन क्षेत्र कोरोना महामारी अगाडिको अवस्थामा फर्किने दाबी पनि गरे।

नेपालको बैंकिङ क्षेत्रले ठूलो मात्रामा पुँजी परिचालन गरे पनि त्यस अनुसार रोजगारी र प्रतिफल भने दिन नसकेको प्रधानमन्त्री प्रचण्डको भनाइ थियो।