म्यानचेस्टर डर्बीमा युनाइटेडको रोमाञ्चक जित

काठमाडौँ- इङ्लिस प्रिमियर लिगअन्तर्गत आइतबार राति भएको म्यानचेस्टर डर्बीमा म्यानचेस्टर युनाइटेडले म्यान्चेस्टर सिटीलाई पराजित गरेको छ।

सिटी अफ म्यान्चेस्टर स्टेडियम (एटिहाद) मा भएको खेलमा युनाइटेडका अमाद डायलोले ९०औ‍ँ मिनेटमा निर्णायक गोल गर्दै टिमलाई २–१ को रोमाञ्चक जित दिलाएका हुन्। चार पटकको डिफेन्डिङ च्याम्पियन म्यानचेस्टर सिटीले ३६औँ मिनेटमा जोस्को ग्वार्डिओलको हेड गोलमार्फत अग्रता बनाएको थियो।

युनाइटेडले अन्तिम दुई मिनेटमा जादुमयी प्रदर्शन गरेको थियो। ८८औँ मिनेटमा म्याथियस नुनेसको अन्डरहिट ब्याकपासबाट डायलोले मौका पाएका थिए। नुनेसले आफ्नै डी-बक्सभित्र डायलोलाई चुनौती दिएपछि रेफ्री एन्थोनी टेलरले पेनाल्टी दिए। ब्रुनो फर्नान्डिसले पेनाल्टीमा कुनै गल्ती नगरी बराबरी गोल फर्काए। थप समयमा लिसान्द्रो मार्टिनेजको लामो पासलाई सदुपयोग गर्दै डायलोले सानदार गोल गरेर युनाइटेडको जित सुनिश्चित गरे।

युनाइटेडका नयाँ प्रशिक्षक रुबेन अमोरिमका लागि यो डर्बी जित विशेष रह्यो। ‘यो कठिन खेल थियो, तर हामी अन्त्यसम्म विश्वास गरिरह्यौं। यो जित हाम्रा सर्थकहरूका लागि निकै महत्त्वपूर्ण छ,’ उनले भनेका छन्।

११ खेलमा मात्र एक जित र आठ हार भोग्दै आएको युनाइटेडका लागि यो डर्बी जितले पुनरुत्थानको संकेत दिएको छ। अंकतालिकामा युनाइटेड २२ अंकका साथ १३औँ स्थानमा छ भने सिटी पाँचौँ स्थानमा छ।