बागमतीका अर्थमन्त्री लामालाई चार मन्त्रालयको जिम्मा

काठमाडौं– बागमती प्रदेशका आर्थिक मामिला तथा योजनामन्त्री बहादुरसिंह लामालाई थप तीन मन्त्रालयको जिम्मेवारी दिइएको छ। मुख्यमन्त्री शालिकराम जम्कट्टेलको सिफारिसमा प्रदेश प्रमुख यादवचन्द्र शर्माले लामालाई वन तथा वातावरण मन्त्रालय, स्वास्थ्य मन्त्रालय र पर्यटन उद्योग तथा सहकारी मन्त्रालयको जिम्मेवारी थपिदिएका हुन्।

प्रदेश प्रमुख शर्माले सूचना जारी गर्दै मुख्यमन्त्री जम्कट्टेलको सिफारिसमा लामालाई थप मन्त्रालयको जिम्मेवारी दिइएको उल्लेख गरेका छन्।

बुधबार मन्त्री लामाले स्वास्थ्य मन्त्रालयमा स्वागतको क्रममा सम्पूर्ण कर्मचारीलाई एकबद्ध भई सेवाभावले काम गर्न र चुस्तदुरुस्त सेवा दिन निर्देशन दिए। निर्देशनकै क्रममा मन्त्री लामाले अहिलेको अवस्थामा राजस्व आशातीत उठ्न नसकेको कारण स्रोतको कमी भएको बताए।

बागमती प्रदेशका ११ मध्ये ६ वटा मन्त्रालयमा मात्र मन्त्री नियुक्त भएका छन्। पाँच वटा मन्त्रालय मन्त्रीविहीन रहँदै आएका थिए। सत्तारुढ दलबीच भागबन्डा नमिल्दा सरकारलाई पूर्णता दिन नसकेपछि मुख्यमन्त्री जम्कट्टेलले कांग्रेस नेता लामालाई थप तीन मन्त्रालयको जिम्मेवारी दिएका हुन्।

अझै पनि प्रदेशको दुई मन्त्रालय मन्त्रीविहीन अवस्थामै छन्। बागमती प्रदेशमा पाँच वटा मन्त्रालय कांग्रेसले सम्हालेको छ भने माओवादी केन्द्रले चार मन्त्रालय सम्हाल्दै आएको छ।

प्रदेशको कृषि तथा पशुपन्छी मन्त्रालय र श्रम रोजगार तथा यातायात मन्त्रालयमा अझै मन्त्री नियुक्त हुन सकेका छैनन्। यी मन्त्रालय भने मुख्यमन्त्री जम्कट्टेलले नै सम्हाल्दै आएका छन्।