आज प्रतिनिधिसभामा प्रधानमन्त्री प्रचण्डसँग सांसदहरूको सवालजवाफ

काठमाडौं– आज बिहान ११ बजे बोलाइएको प्रतिनिधिसभा बैठकमा प्रधानमन्त्री पुष्पकमल दाहाल प्रचण्ड र सांसदहरुबीच प्रश्नोत्तर हुने सम्भावित कार्यसूची सार्वजनिक भएको छ।

संघीय संसद् सचिवालयका महासचिव डा. भरतराज गौतमले बुधबार सार्वजनिक गरेको सम्भावित कार्यसूचीअनुसार बिहीबार बस्ने प्रतिनिधिसभा बैठकमा प्रधानमन्त्री प्रचण्डले सांसदबाट सोधिएको प्रश्नको जवाफ दिनेछन्।

बैठकमा प्रधानमन्त्री प्रचण्डले राज्यका निर्देशक सिद्धान्त, नीति र दायित्व कार्यान्वयनका सम्बन्धमा गरेका काम र प्राप्त उपलब्धिसहितको आर्थिक वर्ष २०७८÷७९ को वार्षिक प्रतिवेदन पेस गर्ने कार्यसूची छ। हालसम्म संसद्मा प्रधानमन्त्री प्रचण्डसँग १५ जना सांसदले प्रश्न सोध्न नाम टिपाएका छन्।

कार्य व्यवस्था समितिले तय गरेको सम्भावित कार्यसूचीअनुसार आज प्रधानमन्त्री प्रचण्डले सांसदहरूले सोधेका प्रश्नको जवाफ दिनेछन्। संसद् नियमावलीको नियम ५६ अनुसार सांसदले प्रधानमन्त्रीलाई प्रश्न गर्नेछन् र प्रधानमन्त्रीले तत्कालै जवाफ दिनेछन्। सांसदले प्रधानमन्त्रीलाई सोध्ने प्रश्नको विषय सभामुख देवराज घिमिरेलाई पहिले नै जानकारी गराउनुपर्ने प्रावधान छ।

प्रधानमन्त्रीलाई प्रश्न सोध्न १५ जना सांसदले नाम टिपाएका छन्। एक दिनको बैठकमा बढीमा १५ जना सदस्यले मात्र प्रश्न सोध्न सक्ने व्यवस्था नियमावलीमा उल्लेख छ। सांसदहरूले प्रधानमन्त्रीलाई समसामयिक विषयमा प्रश्न सोध्ने जानकारी सभामुखलाई गराएका छन्।

प्रतिनिधिसभामा नक्कली शरणार्थी प्रकरणमा राजनीतिक संलग्नता, नागरिकता विधेयक, आर्थिक संकटलगायत विषयमा रहेर सांसदहरुले प्रधानमन्त्री प्रचण्डलाई प्रश्न सोध्ने आकलन छ। प्रतिनिधिसभामा आगामी आव २०८०/८१ को बजेटमाथिको छलफल जारी छ। आज दोस्रो अधिवेशनको छैंटौं बैठक बिहान ११ बजे बस्नेछ।

आइतबार बसेको कार्यव्यवस्था परामर्श समितिको बैठकमा प्रधानमन्त्रीले प्रतिनिधिसभा बैठकमा गर्ने प्रश्नोत्तरको सम्बन्धमा छलफल भएको थियो। उक्त छलफलमा प्रधानमन्त्रीले नियमावलीमा व्यवस्था भएबमोजिम प्रत्येक महिनाको पहिलो साता प्रधानमन्त्रीलाई अनुकूल हुने दिन निर्धारण गरेर प्रश्नोत्तर गर्ने सहमति भएको थियो।