महानगरले भत्कायो जडिबुटी प्रहरी बिट [तस्बिरहरू]

काठमाडौँ- काठमाडौँ महानगरपालिकाले कोटेश्वर जडिबुटीस्थित प्रहरी बिट भत्काएको छ। महानगरले सोमबार दिउँसो महानगरीय प्रहरी वृत्त मातहतको बिट भत्काएको हो।

सडकपेटीमा बनाइएको उक्त बिटले सडक क्षेत्र अतिक्रमण गरेको भन्दै भत्काइएको महानगरले जानकारी दिएको छ। ‘सडकपेटीमा हिँड्न पाउने जनताको स्वतन्त्रलाई रक्षा गर्नको लागि प्रहरीसँगको समन्वयमै यो भवन भत्काइएको हो,’ काठमाडौं महानगर प्रहरी राजुनाथ पाण्डेले भने, ‘ प्रहरीहरुलाई सडकमै राखिएको छ। उनीहरुले प्रहरीले राम्रो ठाउँ व्यवस्थापन गरेर राख्नुपर्छ। उहाँहरुले वैकल्पिक व्यवस्था गर्नुपर्छ।’

महानगरले सडकपेटीमा बनेका संरचना भत्काउने कामलाई निरन्तरता दिँदै आएको छ। महानगरमा बालेन्द्र साह मेयर बनेर आएपछि उनले यो कामलाई तीव्रता दिएका हुन्।

वैशाख १२ गते महानगरले पुरानो बसपार्कको अस्थायी प्रहरी बिट पनि हटाएको थियो। त्यसअघि उसले मैतिदेवीको पुलिस बिट भत्काएर बाटो खुल्ला गरेको थियो। साथै सडकपेटीमा अव्यवस्थित फुटपाथ बजारलाई पनि महानगरले हटाउँदै आएको छ।