एनआरएनएको एकता महाधिवेशन गराउन घलेको नेतृत्वमा बन्यो १५० सदस्यीय समिति

काठमाडौँ- गैरआवासीय नेपाली संघ (एनआरएनए)को एकता महाधिवेशन गराउन पूर्वअध्यक्ष शेष घलेको नेतृत्वमा मूल आयोजक समिति गठन गरिएको छ। घलेको नेतृत्वमा १५० जना अभियन्ता रहने गरी मूल आयोजक समिति बनाइएको हो।

आइतबार बसेको एनआरएनए उच्चस्तरीय समितिको सातौँ बैठकले यस्तो निर्णय गरेको सदस्य विनोद कुँवरले जानकारी दिए। कुल आचार्यको नेतृत्वमा आर्थिक, कुँवरको नेतृत्वमा एनसीसी समन्वय समिति, जानकी गुरुङको नेतृत्वमा प्रचारप्रसार र डेलिगेट्स/मेम्बरसिप समिति बनाइएको छ।

सबै पक्षसँग एकताका लागि जीवा लामिछानेको नेतृत्वमा समन्वय समिति बनाइएको छ। आगामी मे महिनामा एकता महाधिवेशन गर्ने तयारी छ।

एनआरएनएको गत महाधिवेशनमा बद्रि केसी चुनिएका थिए। तर निर्वाचनमा पराजित पक्ष सर्वोच्च गएको थियो। यसपछि गत वर्ष चैत २१ मा सर्वोच्चले एकता महाधिवेशन गर्नुपर्ने फैसला सुनाएको थियो। यसपछि परराष्ट्रले केसी पक्षलाई काम गर्न रोक लगाउँदै पत्र पठाएको थियो। त्यसविरुद्ध फेरि केसी पक्ष अदालत गयो। साउनमा केसी पक्षलाई काम गर्न रोक लगाउनु नपर्ने फैसला सुनायो।

सोही फैसलापछि केसी पक्षले आफूहरूले आधिकारिकता पाएको जिकिर गर्दै एकता महाधिवेशन जरुरी नभएको बताउँदै आएको छ।