सामाजिक सञ्जाल प्रयोगकर्ताको अधिकार एक सेन्टिमिटर पनि तलमाथि हुन दिइन्न : प्रधानमन्त्री

काठमाडौँ- प्रधानमन्त्री केपी शर्मा ओलीले सामाजिक सञ्जाल प्रयोगकर्ताको अधिकार एक सेन्टिमिटर पनि तलमाथि हुन नदिने गरी सामाजिक सञ्जालको नियमन गर्ने तयारीमा सरकार रहेको बताएका छन्।

बिहीबार काठमाडौँमा भएको डिजिटल अपराधसम्बन्धी अन्तर्राष्ट्रिय सम्मेलनलाई सम्बोधन गर्दै प्रधानमन्त्री ओलीले यस्तो बताएका हुन्।

समाजिक सञ्जालमा हुने असामाजिक गतिविधिलाई रोक्नैपर्ने भएको र त्यसका लागि सरकारले तयारी अघि बढाएको प्रधानमन्त्रीको भनाइ छ। ‘यस्तो कुरा रोक्नुपर्छ भन्दा डिबेट गर्ने नै होइन, त्यो विरोधका लागि विरोध मात्र हो’, प्रधानमन्त्रीको भनाइ थियो।

सरकारले जनतामा पूर्ण डेमोक्रेसी चाहेको बताएका छन्। मानिस सुखी र खुसी हुन पूर्ण डेमोक्रेसी आवश्यक रहेको उनको भनाइ थियो।

राजनीतिक परिवर्तनले मात्र मानिस खुसी र सुखी बन्न नसक्ने बताएका ओलीले मानिसलाई खुसी हुन नदिने एउटा तत्त्व अपराध पनि भएको उल्लेख गरे। प्रधानमन्त्री ओलीले मानवजाति अझै पनि अभाव र भोकमरीमा तड्पिरहनुपरेको उल्लेख गरे।

‘मानिस अभाव र भोकमरीमा तड्पिरहेको छ भने अरु कुराले मात्र सुखी हुन सक्दैन’, प्रधानमन्त्री ओलीले भने, ‘हामी परिपूर्ण डेमोक्रेसी चाहन्छौँ। सामाजिक जीवन उन्नत हुनुपर्छ। जैविक र मानवीय आवश्यकताको सहज आपूर्ति हुन सके मात्र समाजलाई समृद्ध, सन्तुष्ट र खुसी राख्न सकिन्छ।’

सूचना प्रविधिले मानव जातिलाई सुखसुविधा दिने भएपनि यसको दुरुपयोगबाट अपराधसमेत हुने गरेकाले सचेत हुन जरुरी रहेको प्रधानमन्त्रीको भनाइ छ।

‘समाजमा ठुलो परिवर्तन आएको छ। राजनीतिक परिवर्तन र अरु स्वतन्त्रताका हकको मात्र होइन। हामी हरेक हिसाबले अधिकार सम्पन्न हुन चाहन्छौँ’, प्रधानमन्त्रीले भने, ‘सामाजिक प्रबन्धहरु यसरी गइरहेको छ कि अझैपनि डिजिटलको कुरा गरिरहेका छौँ। त्यसै बेला उल्लेखनीय प्रतिशत मानव जाति निरपेक्ष गरिबीको रेखामुखि छ।’