अपराधी जोगाउन आईजीपी कुँवरले प्रयास गरेको भन्दा संगठनको छविमा आँच पुग्यो : नेपाल प्रहरी

काठमाडौँ- नक्कली शरणार्थी प्रकरणमा अनुसन्धान नगरी किनारा लगाउन प्रहरी महानिरीक्षक (आईजीपी) बसन्त कुँवरले भूमिका खेलेको भनी पक्राउ परेकाहरूले दिएको बयानप्रति नेपाल प्रहरीले खण्डन गरेको छ। प्रहरीका प्रवक्ता कुवेर कठायतले विज्ञप्ति जारी गर्दै पक्राउ परेकाहरुले दिएको बयान र त्यसलाई समाचार बनाइएको विषयमा गम्भीर ध्यानाकर्षण भएको बताइएको हो।

‘काठमाडौँ उपत्यका अपराध अनुसन्धान कार्यालयका तत्कालीन प्रमुख (हाल प्रहरी महानिरीक्षक) बसन्त बहादुर कुँवरले ‘नक्कली भुटानी शरणार्थी बनाउने प्रकरण’को मुद्दाका आरोपितहरुसँग सम्पर्क रहेको, पूर्वगृहमन्त्रीलाई जोगाउन प्रयास गरेको लगायतका काम गरेको भन्दै समाचार सम्प्रेषण गरेको पाइयो,’ प्रहरीको विज्ञप्तिमा उल्लेख छ, ‘दुई व्यक्तिले गरेको संवादकै आधारमा शरणार्थी प्रकरणका आरोपितबाट प्रहरी प्रमुख स्वयंले नै आर्थिक फाइदा लिएको भन्ने अतिशयोक्ति तथ्य स्थापित गर्न खोजी प्रहरी महानिरीक्षकलाई विवादमा तानिनु अत्यन्त निन्दनीय छ।’

नक्कली शरणार्थी प्रकरणमा नेपाल प्रहरीले नै सफल अनुसन्धान गरी मुद्दा पेस गरिसकेको अवस्थामा आरोपित भगाउन प्रहरी महानिरीक्षक संलग्न भएको भनी समाचार लेख्नु दुःखद भएको प्रहरीको भनाइ छ। प्रहरी दोषी नछुटुन्, निर्दोष नफसुन् भन्नेमा सचेत रहेको जिकिर गरिएको छ। ‘महानिरीक्षकलाई नै विवादमा तानेर अपराधी जोगाउन प्रयासरत रहेको भनिनुले समग्र संगठनको छविमा आँच पुगेको छ,’ प्रहरीको विज्ञप्तिमा उल्लेख छ।