शेखरले भने- यो विधानत कांग्रेसको महाधिवेशनको वर्ष हो, टार्न खोजे आत्मघाती हुनेछ

नेपाली कांग्रेसका नेता शेखर कोइरालाले पार्टीभित्र ‘क्लिन पोलिटिक्स’ अभियान सञ्चालन गरिनुपर्ने बताएका छन्।

नयाँ वर्षका अवसरमा शुभकामना दिँदै कोइरालाले राजनीतिमा देखा परेका विकृति र विसंगती हटाउन ‘क्लिन पोलिटिक्स’ अभियान सञ्चालनको प्रस्ताव अघि सारेका हुन्।

‘हामी सबै राजनीतिमा देखिएको विकृति विसंगतिको चर्चा गर्छौं, यसको उपचारको खोजी पार्टी भित्रबाट गर्नुपर्छ भन्ने मेरो मान्यता हो। पार्टीको अगुवाइमा ‘क्याम्पेन फर क्लिन पोलिटिक्स’ को अभियान नचलाई बस्ने हो भने बिपी कोइरालाले भन्नु भएझैं कांग्रेस पार्टी ‘सुकिला मुकिला र पैसावालाको कब्जा’मा जाने खतरा छ, र म त्यो देख्दैछु,’ कोइरालाले भने।

साथै उनले सामान्य त्रुटि हुँदा पनि मुलुक गतल दिशातिर जान सक्ने उल्लेख गरेका छन्।

‘हामी यतिखेर इतिहासको त्यो दोबाटोमा उभिएका छौं, जहाँबाट सामान्य त्रुटि हुँदा र गलत दिशातर्फ जाँदा हाम्रो देश नेपाल ठूलो जोखिममा पर्छ,’ राजसंस्था पुनर्स्थापनाका लागि भइरहेका चर्चा र आन्दोलनतर्फ लक्ष्य गर्दै कोइरालाले भने।

साथै उनले अन्तर्राष्ट्रिय मञ्चमा देखिएको ‘शितयुद्ध २’ ले एकपटक फेरि हामीलाई आजभन्दा झण्डै पाँच दशक अगाडि बिपी कोइरालाले प्रतिपादन गरेको “राष्ट्रिय मेलमिलाप” को स्मरण गराएको उनको भनाइ छ।

नेपाली राष्ट्रियता, धर्म संस्कृति र समृद्धिको लागि एकपटक फेरि कांग्रेसमा पुर्नजागरणकाल जगाउनु पर्ने पनि उनले बताए।

‘यो तबमात्र सम्भव छ, जब कांग्रेसका साथीहरू जाग्नेछन्। कांग्रेसका इमान्दार, निस्वार्थी र स्वाभिमानी साथीहरूको सक्रियताबिना पार्टीमा इमान र नैतिकताको राजनीतिक भावधारा बगाउन सम्भव छैन,’ उनले भने।

नयाँ वर्ष २०८२ को नारा पार्टीमा क्लिन पोलिटिक्स भनी अगाडि नसार्दा नागरिकको विश्वास र भरोसा जित्न गाह्रो रहने पनि उनले बताए।

कुशासन, भ्रष्टाचार, दण्डहिनता र अनियमितता संस्थागत भएर चुँडिदै गएको नागरिक र पार्टीको सम्बन्धलाई जोडन पार्टीभित्र शुद्धीकरण अभियान चलाउनुको विकल्प नरहेको कोइरालाको भनाइ छ।

‘नेपालको संविधानलाई दक्षिणपन्थी भासवाट जोगाएर समसामयिक सुधार गर्दै अगाडि बढाउन कांग्रेसको तर्फबाट साथीहरू अगाडि आउनुपर्छ। यो वर्ष विधानतः कांग्रेस महाधिवेशनको वर्ष हो। कुनै कारण देखाएर कांग्रेस महाधिवेशनलाई टार्न खोज्ने काम आत्मघाति हुनेछ। यसतर्फ कांग्रेसका साथीहरुलाई चनाखो र सतर्क रहन पनि म अपिल गर्दछु,’ उनले भने।

आफू र आफ्नो दलभन्दा “देश र जनता” माथि छन् भन्ने सोचले काम गरे मात्रै देशले निकास पाउने पनि उनले बताए।