बयान मात्रकै आधारमा पक्राउ गर्न मिल्दैन : गृहमन्त्री श्रेष्ठ

काठमाडौँ- उपप्रधान एवं गृहमन्त्री नारायणकाजी श्रेष्ठले नक्कली भुटानी शरणार्थी प्रकरणमा पक्राउ परेका आरोपितले दिएको बयानकै आधारमा कसैलाई पनि पक्राउ गर्न नसकिने बताएका छन्। नेकपा एमालेको भ्रातृ संगठन राष्ट्रिय युवा संघ नेपालले नक्कली भुटानी शरणार्थी प्रकरणबारे निष्पक्ष छानबिनको माग गर्दै बुझाएको ज्ञापनपत्र बुझ्दै गृहमन्त्रीले यस्तो बताएका हुन्।

‘यो विषयमा पनि बयानलाई आधार बनाइएको छ। बयानसँग मेल खाने गरी अरू तथ्यप्रमाणलाई जोडेर अघि बढाउने काम प्रहरीले गरिरहेको छ। बयान मात्रकै आधारमा चाहिँ अलिक मिल्दैन भन्ने छ,’ गृहमन्त्रीले भने, ‘बयान मात्र नभएर तथ्यप्रमाणलाई पनि आधार बनाएर प्रहरीले अनुसन्धानलाई अघि बढाएको छ।’

देशमा भ्रष्टाचारको जालो व्याप्त रहेको र कमिसनको जालो नतोड्दासम्म समृद्धिको यात्रा सफल हुन नसक्ने उनको भनाइ छ। भ्रष्टाचार नियन्त्रण गर्न आवश्यक भएको उनले उल्लेख गरे।

आफूले प्रहरीलाई कुनै पनि प्रकारको दबाब वा प्रभावबाट मुक्त राखेर अघि बढ्न निर्देशन दिएको उल्लेख गरे। ‘आर्थिक चलखेलबाट मुक्त भई निष्पक्ष भएर छानबिनको प्रक्रिया अघि बढाउन मैले निर्देशन दिएको छु,’ उनले भनेका थिए।