कालीकोटमा ट्र्याक्टर दुर्घटना हुँदा चालकसहित ४ जनाको मृत्यु

काँक्रेविहार- कालीकोटमा ट्र्याक्टर दुर्घटना चार जनाको मृत्यु भएको छ। पलाँता गाउँपालिका–९ थिर्पुबाट पलाँता–४ छलतर्फ खाद्यान्न, खुद्रा सामान लिएर जाँदै गरेको नम्बर नखुलेको ट्र्याक्टर पलाँता–२ बुडाडाँडा नजिक गएराति दुर्घटनामा परेको जिल्ला प्रहरी कार्यालयले कालीकोटले जनाएको छ।

दुर्घटना मृत्युहुनेमा ट्र्याक्टर चालक मुगु, खत्याड गाउँपालिका–५ कवाका २५ वर्षीय चन्द्र प्रकाश रोकाय, कालीकोट, पलाँता गाउँपालिका–४ का २१ वर्षीय रवीन्द्र विक, सोही स्थानका ३२ वर्षीया सदु बुढा र पलाँता–५ सल्लीकोटकी अन्दाजी २६ वर्षीय अम्बा शाही छन्। उनीहरुको घटनास्थलमै मृत्यु भएको सो कार्यालयका प्रमुख टेकबहादुर रावतले जानकारी दिए।

उनका अनुसार दुर्घटनाग्रस्त ट्र्याक्टर सडकभन्दा तल अप्ठेरो भिरमा अड्किएको छ। शवहरु भने सडकभन्दा करिब २०० मिटर तल भेटिएको थियो।

इलाका प्रहरी कार्यालय थिर्पुबाट गएको प्रहरी सहायक निरीक्षक भीमबहादुर सुनारको कमान्डको प्रहरी टोलीले उद्धार गरेको थियो। -रासस