आधारभूत कुरामा पनि ‘कम्प्रमाइज’ गर्नुपरे सरकारमा बस्दैनौँ : गगन थापा

काठमाडौँ- नेपाली कांग्रेसका महामन्त्री गगन थापाले कांग्रेस समस्याबाट भागेर नहुने बताएका छन्। लोकतन्त्र दिवसमा आयोजित संवादमा बोल्दै उनले कांग्रेस अहिले सरकारमा जानुपरेको बाध्यता सुनाएका हुन्।

‘हामीले समस्याको कुरा मात्रै गरेर हुँदैन समाधान पनि दिनुपर्छ। आज हामी बाध्यतामा छौँ, एक्लै छैनौँ सरकारमा छौँ। कतिपय हामीले कम्प्रमाइज गरेका छौँ,’ उनले भने, ‘तर आधारभूत कुरामा हामी कम्प्रमाइज गर्दैनौँ। हामीले भन्न सक्नुपर्छ, पर्‍यो भने यस्तो सरकारबाट बाहिर जान्छौँ हामी। सरकारै सबैभन्दा ठूलो कुरा होइन। मैले यो सरकारको मात्रै कुरा गरेको होइन।’

उनले कांग्रेसले शिक्षक आन्दोलन, निजामती कर्मचारीलगायतको आन्दोलनको विषयमा जिम्मेवार ढङ्गले प्रस्तुत हुनुपर्ने बताए।

उनले अन्य दलबाट राष्ट्रपति, उपराष्ट्रपति भएका व्यक्तिहरू राजनीतिमा फर्किए पनि कांग्रेसमा त्यस्तो नहुने भन्न सक्नुपर्ने बताए।

उनले आफूले निराशा बढाउन नखोजेको भन्दै प्रमुख पार्टीमा रहेका शीर्ष नेताहरूप्रति आम मानिसको भरोसा टुटिसकेको बताए।