डेढ महिना लामो पाटनको स्ववियु निर्वाचन, एक सदस्यबाहेक सबै पदमा नेविसंघ विजयी

ललितपुर- ललितपुरको पाटन संयुक्त क्याम्पसमा मतदान सुरु भएको डेढ महिनापछि मात्र मतदान सम्पन्न भएको छ। चैत ५ गते मतदान सुरु भएपछि विद्यार्थी संगठनबीच झडपका कारण स्थगित भएको मतदानले वैशाख २० गते मात्र निरन्तरता पाएको हो। चैत ५ गते ११९ मत खसेको थियो।

उक्त मतलाई सुरक्षित राखेर शनिबार सम्पन्न मतदानको समेत मतमा जोडेर निर्वाचिनको नतिजा घोषणा गरिएको छ। शनिवार राति अबेर घोषणा गरिएको मतगणना नतिजाअनुासर एक सदस्यबाहेकका सबै पदमा नेपाल विद्यार्थी संघ (नेविसंघ)का उम्मेदवार विजयी भए।

अध्यक्षमा नेविसंघका रोहित कपालीले फराकिलो मतान्तर बनाएर विजयी बनेका छन्। रोहितले ९०६ मत प्राप्त गर्दा निकटतम प्रतिस्पर्धी अनेरास्ववियुका तिलकबहादुर कुमालले ३६५ मत ल्याए। माओवादी केन्द्रनिकट अखिल क्रान्तिकारीका दीपककुमार राना मगरले १५३ मत ल्याएका थिए।

नेविसंघका रूपक न्यौपाने ५४७ मत ल्याएर सचिवमा विजयी बने। अनेरास्ववियुका नितिन पाण्डेयले ४८६ मत ल्याएका थिए।

नेविसंघकै प्रज्वल तामाङले ५९२ मत ल्याएर कोषाध्यक्ष बन्दा अनेरास्ववियुकी सुष्मा शाहीले ४४९ मत पाइन्।

सदस्यमा नेविसंघबाट राम दाहाल, दिपेन्द्र अगरेजा मगर, प्रल्हाद कटुवाल, विशाखा शाही, जेनिश शाह, रोशन खत्री र रिशब भगत सदस्य निर्वाचित भए। सदस्यमा अनेरास्ववियुबाट माधव पाण्डे विजयी भए। अखिल क्रान्तिकारीले कुनै पनि पदमा जित निकाल्न सकेन।

शनिबार सम्पन्न भएको मतदानमा १ हजार ६७७ मत खसेको थियो।