गृहमन्त्रीको राजीनामा नआएसम्म संसद चल्न नदिने प्रतिपक्षीको निर्णय

काठमाडौँ- संघीय संसद्मा प्रतिनिधित्व गर्ने विपक्षी दलको बैठकले गृहमन्त्रीको राजीनामा नआएसम्म प्रतिनिधिसभाको बैठक चल्न नदिने निर्णय गरेका छन्।

संसद् भवन नयाँबानेश्वरमा आज बसेको विपक्षी तीन दलको बैठकले ‘भिजिट भिसा प्रकरण’ मा मुछिएका गृहमन्त्री रमेश लेखकको राजीनामा नआएसम्म सदन चल्न नदिने निर्णय गरेका हुन्।

यो प्रकरणमा उच्च छानबिन समिति बनाउनु पर्ने पनि उनीहरूको माग छ।

छानबिन समिति र गृहमन्त्रीको राजीनामा नआएसम्म प्रतिनिधिसभा बैठक बस्न नसक्ने निष्कर्ष निकालेको राष्ट्रिय स्वतन्त्र पार्टी (रास्वपा) का सांसद मनिष झाले जानकारी दिए।

श्रम ऐन, २०६४ आएदेखि हालका गृहमन्त्रीको कार्यकालसम्मको ‘भिजिट भिसा प्रकरण’ मा सम्बन्धित रहेर छानबिन आयोग बनाउन प्रतिपक्षी दलले माग गरेका छन्।

प्रमुख प्रतिपक्षी दल नेकपा (माओवादी केन्द्र), रास्वपा र नेकपा (एकीकृत समाजवादी)का नेताहरु बैठकमा सहभागी थिए ।

बैठकमा उक्त प्रकरणलाई सधैँका लागि निराकरण गर्न सर्वपक्षीय प्रतिबद्धता जनाउनुपर्ने पनि यी तीन दलको माग छ।

भिजिट भिसा प्रकरणमा सत्तापक्ष र प्रतिपक्षबिच कुरा नमिलेपछि बैठक आइतबार एक बजेसम्मका लागि सूचना टाँसेर स्थगित गरिएको हो।

शुक्रवार दिउँसो १ बजेका लागि बोलाइएको बैठक दिउँसो ३ बजे सूचना टाँसेर आइतबारसम्मका लागि सारिएको सभामुख देवराज घिमिरेका प्रेस संयोजक शेखर अधिकारीले जानकारी दिए।

यसअघि भिजिट भिसा प्रकरणमा प्रतिनिधिसभा बैठक जेठ १३ गते र २२ गते सुरु भएर कार्यसूचीमा प्रवेश नगरी स्थगित भएको थियो। जेठ १४, २०, २१ र २३ सूचना टाँसेर सारिएको हो।