बेलायतमा कञ्‍चनजंघा आरोहणको स्मरण, दीगो पर्यटनको प्रतिबद्धता

काठमाडौँ- संयुक्त अधिराज्य बेलायतको राजधानी लन्डनमा कञ्‍चनजंघा आरोहणको स्मरण गरिएको छ। नेपाल पर्यटन बोर्डले कञ्‍चनजंघा आरोहणको ७० वर्ष पूरा भएको अवसरमा लन्डनमा आयोजना कार्यक्रममा कञ्‍चनजंघा आरोहीमार्फत् आरोहणको स्मरण गरिएको हो।

लन्डनको रोयल जियोग्राफिकल सोसाइटीको सभाहलमा संयुक्त अधिराज्य बेलायतको पर्वतारोहण टोलीले सन् १९५५ मा पहिलो पटक विश्‍वको तेस्रो ठूलो हिमाल आरोहण गरेको अवसरमा आयोजित कार्यक्रममा कञ्‍चनजंघा आरोहण गरेका व्यक्तिहरुको सपना, संघर्ष र अनुभव सुनाएका हुन्। जसमा नेपालका प्रसिद्ध पर्वतारोही मिङ्‌मा डेभिड शेर्पाले आफ्नो शिखर यात्राको कथा सुनाउँदा सभाहल तालीले गुञ्‍जयमान भएको थियो।

उनले विश्व समुदायलाई हिमाली पारिस्थितिक प्रणालीको सम्मान गर्न, जलवायु परिवर्तनले हिमालमा पारिरहेको असरलाई न्युनिकरण गर्ने उपायहरु अवलम्बन गर्न र दिगो भविष्य निर्माणका लागि एकजुट हुन आग्रहसमेत गरेका छन्। कार्यक्रममा पर्यटन प्रबर्द्धनमा प्रमुख भूमिका खेलिरहेका कञ्चनजङ्घा क्षेत्रको स्थानीय समुदायको योगदानलाई पनि विशेष रूपमा उजागर गरिएको थियो।

कार्यक्रममा एडिनबरा ड्युक, राजकुमार एडवर्डको समेत उपस्थिति रहेको थियो। उनको उपस्थितिले नेपाल र बेलायतबीचको ऐतिहासिक सम्बन्धको गहिराई राज्य तहमा मात्र होइन, जनस्तरसम्म पुग्ने मित्रताको प्रतिकको रुपमा अर्थ्याइएको छ। सोही अवसरमा नेपाल पर्यटन बोर्डका प्रमुख कार्यकारी अधिकृत (सीईओ) दीपकराज जोशीले कञ्‍चनजंघा एउटा हिमाल मात्र नभएर जीवित सम्पदा भएको उल्लेख गरेका छन्। उनले भने, “कञ्चनजङ्घा हिमाल मात्र होइन, यो एक जीवित सम्पदा हो, जसले समुदायहरूलाई जोड्छ, साहसिक यात्रुहरूलाई प्रेरणा दिन्छ, र प्रकृति संरक्षणप्रति हाम्रो साझा उत्तरदायित्व सम्झाउँछ।”

सीईओ जोशीले यस्ता कार्यक्रमहरूले नेपाल–बेलायत मित्रतालाई अझ सुदृढ बनाउने र दिगो, समावेशी हिमाली पर्यटनको परिकल्पनालाई थप सशक्त बनाउने विश्‍वास व्यक्त गरेका छन्। यससँगै सीईओ जोशीले विश्व मञ्चमा नेपालको हिमाली सम्पदाको प्रवर्द्धन गर्न, साथै प्रकृति र स्थानीय समुदाय दुवैलाई लाभ पुग्ने उत्तरदायी पर्यटनको पक्षमा निरन्तर आवाज उठाउने प्रतिबद्धता जनाएका छन्।

कार्यक्रममा बेलायतस्थित नेपाली राजदूतावास, नेपाल पर्यटन बोर्डका प्रतिनिधिहरू, साथै बेलायत र नेपालका नेपाली समुदायका सदस्यहरूको सहभागिता थियो।