बाजुरा आगलागी : ३५ पसलमा झन्डै ९ करोडको क्षति, पर्यटनमन्त्रीले गरे निरीक्षण

बाजुरा- शुक्रबार बुढीगङ्गा नगरपालिका–६ बाम्का बजारमा नवदुर्गा होटलमा खाना पकाउने ग्यासको सिलिन्डर पड्किएर भएको आगलागीमा ३५ पसलमा ८ करोडको क्षति भएको अनुमान गरिएको छ।

जिल्ला प्रहरी कार्यालयका प्रहरी निरीक्षक तथा सूचना अधिकारी देवबहादुर चौधरीका अनुसार बाम्का बजारका पसल पूरै जलेर सखाप भएका हुन्।

आगलागीबाट ८ करोड ७७ लाख ६५ हजारभन्दा बढी रकम बराबरको क्षति भएको बताए। योगनाथ न्यौपानेको किनारा पसलको रु एक करोड ८० लाख क्षति भएको पाइएको छ। आगलागीबाट दीपक साउद, रामु अयडी, तुल कटुवाल र उद्धव थापाको पसलको क्षतिको विवरण खुल्न सकेको छैन।

यसैगरी आगलागीबाट तोयानाथ न्यौपानेको रु एक करोड ५० लाख, छत्र थापाको रु एक करोड ५० लाख र धनबहादुर साउदको रु एक करोड ५० लाख क्षति भएको विवरण प्रहरीले सङ्कलन गरेको प्रहरी निरीक्षक चौधरीले बताए।

आगलागीबाट फेन्सी पसल, मेडिकल, इलेक्ट्रोनिक, पुुस्तक पसल र होटल जलेर नष्ट भएको प्रहरी निरीक्षक चौधरीको भनाइ छ। आगलागीबाट भगतराज गिरीको सु प प्र ०१–००१ प ४६८१ नम्बरको मोटरसाइकल जलेर नष्ट भएको छ।

शुक्रबार अपराह्न ३ः३० बजे ग्यास सिलिन्डर पड्किएर आगलागी भए पनि स्थानीय तहमा दमकल नहुँदा ठूलो क्षति भएको पीडितले गुनासो गरेका छन्। ‘स्थानीय तहमा दमकल भएको भए बढी क्षति हुनबाट जोगिने थियो,’ पीडित छत्र थापाले भने।

आगलागीबाट पीडितहरुको तथ्याङ्क सङ्कलन गरी उनीहरुलाई राहत र पुनःस्थापनाका लागि जिल्ला विपद् व्यवस्थापन समितिको शुक्रबार बसेको बैठकले प्रदेश र सङ्घ सरकारसँग पीडितलाई राहत उपलब्ध गराउन माग गर्ने निर्णय गरेको छ।

शुक्रबार आगलागी भएपछि सरकारका संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे प्रभावित क्षेत्रमा पुगेको उनको निजी सचिवालयले जनाएको छ। गत निर्वाचनमा पाण्डे बाजुराबाट प्रतिनिधि सभा सदस्यमा निर्वाचित भएका हुन्।