प्रदेशहरुको बजेट अस्तव्यस्त देखियो, पार्टीले छानबिन गर्नुपर्छ : आङ्गेलु शेर्पा

काठमाडौँ- नेपाली कांग्रेसका केन्द्रीय सदस्य तथा पर्यटन विभाग प्रमुख आङगेलु शेर्पाले प्रदेशहरूले ल्याएको बजेटका विषयमा आपत्ति जनाएका छन्।

कांग्रेसको जारी केन्द्रीय समिति बैठकमा बोल्दै शेर्पाले प्रदेशको बजेटले पार्टीका नेता तथा कार्यकर्ताको मनोबल घटाएको टिप्पणी गरेका हुन्।

शेर्पाले जनातालाई केन्द्रबिन्दुमा राखेर बजेट ल्याउन प्रदेशहरू असफल भएको दाबी गर्दै यसले संघीयतामाथि प्रश्न उठाउनेहरुको मनोबल बढाउने दाबी गरे।

प्रदेशले ल्याएको बजेट जस्ताको तस्तै कार्यान्वनमा आए आर्थिक विचलन र अनियमितताको खतरा बढ्ने औंल्याए। प्रदेशहरुको बजेटमाथि छानबिन गर्न पार्टीले उच्चस्तरीय छनबिन समिति बनाउन माग गरे।

कांग्रेसकै नेतासमेत रहेका बागमती प्रदेशका अर्थमन्त्री कुन्दन काफ्लेले हुँदै नभएको वडा खडा गरेर हेटौँडालाई बजेट विनियोजन गरेका थिए। यस्तै गण्डकी प्रदेशका कार्यक्रम पनि उनले बजेटमा घुसाइदिएका थिए। यो विषयमा सामाजिक सञ्जालमा चर्को आलोचना भइरहेपनि काफ्लेले कुनै प्रतिक्रिया दिएका छैनन्।

संसदभित्र भइरहेका गतिविधिमाथिसमेत शेर्पाले प्रश्न उठाए। सांसदहरुले जथाभावी बोल्दा संसद् आफैँ विकृति र विसंगतिको थलो बन्न थालेकोले छनबिन समिति बनाउन पनि पार्टीले पहल गर्नुपर्ने माग गरे।

पार्टीका भातृ संस्थाहरुको गठन र विघटनमा अल्झिन नहुने उनको भनाइ छ।

माउन्ट कैलाशको दर्शन गर्न जानेहरुका लागि मुस्ताङको कोरला नाका खोल्न पार्टी र सरकारलाई चीनसँग पहल थाल्न उनले सुझाव दिए।

पर्यटन र हिमाल आरोहनमा संलग्न मजदुरका हितका लागि हिमाल आरोहणबाट प्राप्त राजस्वको निश्चित प्रतिसत छुट्याउन पार्टीले पहल गर्नुपर्ने उनको भनाइ छ।