नयाँ ध्रुवीकरणको हल्लाबीच आफूनिकट सांसदसँग शेखरको छलफल

काठमाडौँ- नेपाली कांग्रेसका नेता डा. शेखर कोइरालाले आज आफूपक्षीय सांसदहरुसँग छुट्टै छलफल गरेका छन्।

पार्टीभित्रका केही नेतामाथि अनुशासनको कारबाही भएपछि उनी पार्टी नेतृत्वप्रति असन्तुष्ट बन्दै आएका छन्। यसै सन्दर्भमा उनले पछिल्ला दिनमा भेटघाट तथा राजनीतिक गतिविधि तीव्र बनाएका छन्।

आज दरबारमार्गस्थित होटल याक एण्ड यति होटलमा सांसदहरूलाई नेता कोइरालाले छलफलका लागि बोलाएका हुन्।

संस्थापन इतरका एक नेताले बैठकका लागि कोइरालाले बोलाएको पुष्टि गरे। उनका अनुसार हाल छलफल जारी रहेको छ।

‘आज बिहान पनि छलफल भएको थियो। हाम्रो समूहका सांसदको बैठक बोलाउने तयारी भएको हो। यसैका लागि सांसदहरूलाई बोलाइएको छ,’ कांग्रेस सांसद हृदयराम थानीले भने। ‘छलफलमा आन्तरिक राजनीति र समसामयिक विषयमा कुराकानी हुने उनको भनाइ छ।

शेखर पक्षका सांसद रामकृष्ण यादवले पनि छलफलका लागि बोलाइएको बताएका छन्।

एमाले अध्यक्ष एवं प्रधानमन्त्री केपी शर्मा ओली र कांग्रेस सभापति शेरबहादुर देउवाबीचको सत्ता गठबन्धनलाई अप्ठ्यारो पार्नेगरी नयाँ राजनीतिक ध्रुबीकरणको तयारी भइरहेको हल्लाबिच कोइरालाले आफूपक्षीय सांसदसँग भेटवार्ता गरेका हुन्।

सरकारलाई अप्ठ्यारो पार्नेगरी हुन लागेको राजनीतिक ध्रुवीकरणबारे शनिबार एमाले पोलिटब्युरो बैठकमा समेत कुरा उठेको थियो।

यस अघि उनले शुक्रबार पूर्वराष्ट्रपति विद्या भण्डारी र बिहीबार माओवादी केन्द्रका अध्यक्ष पुष्पकमल दाहालसँग उनीहरूको निवासमै गएर भेट गरेका थिए। यी भेटलाई राजनीतिक सन्देशका रूपमा हेरिएको छ।

कोइराला पक्षले पार्टीभित्रको असहमतिको समाधान संवादमार्फत खोजिनुपर्नेमा जोड दिँदै आएको छ। तर पार्टी नेतृत्वले गरेको कारबाही र त्यसपछिको घटनाक्रमले कांग्रेसभित्र आन्तरिक मतभेद अझ गहिरिँदै गएको देखिन्छ।

अब कोइराला पक्षको भावी रणनीति के हुनेछ भन्ने चासो कांग्रेसभित्र मात्र नभएर समग्र मुलुकको राजनीतिमा समेत देखिन थालेको छ।