एमाले सदस्यता नपाएपछि अब के गर्लिन् विद्या?

काठमाडौँ- नेकपा एमालेको अध्यक्ष बन्ने योजनासहित राजनीतिमा सक्रिय बनेको घोषणा गरेकी पूर्वराष्ट्रपति विद्यादेवी भण्डारी सदस्यताबाट नै बञ्चित भएकी छन्। मंगलबार मध्यरातमा सम्पन्न एमाले केन्द्रीय कमिटी बैठकले पार्टी विधान, संवैधानिक भावना, मूल्य–मान्यता, नैतिकता र विगतका नजिरहरूका आधारमा भण्डारीको राजनीति पुनः प्रवेशमा प्रतिबन्ध लगाएसँगै अब भण्डारी के गर्लिन् भन्ने चासो बढेको छ।

प्रधानमन्त्रीसमेत रहेका एमाले अध्यक्ष केपी शर्मा ओलीले पार्टीमा विद्याले आफूलाई चुनौती दिन सक्ने भयले उनको सदस्यता नै रोक्का गरिदिएका हुन्। यसका लागि ओलीले एमाले विधानको धारा ८ र ९ लाई समाएका छन्। यद्यपि यी धारमा पूर्वराष्ट्रपतिलाई एमाले सदस्यता दिन नसकिने भन्ने उल्लेख छैन।

‘उहाँले सदस्यता त्यागिसकेको अवस्था हो। उहाँको संगठित सदस्यता पार्टीले निर्णय नगरेसम्म नवीकरण हुन सक्दैन। त्यसैले पार्टीले नयाँ निर्णय गरेर मात्रै नवीकरण सम्भव हुन्छ। पार्टी विधानको धारा ८ र ९ अनुसार पूर्वराष्ट्रपतिको संगठित सदस्यता नवीकरण गरेको कुरा नै त्रुटिपूर्ण छ ,’ ओलीले बैठकका निर्णयहरू सुनाउँदै भनेका थिए।

तर, पार्टीको उक्त निर्णयप्रति उपाध्यक्षद्वय सुरेन्द्र पाण्डे, युवराज ज्ञवाली र स्थायी समिति सदस्य कर्ण थापा लगाएतका नेताहरुले असहमति जनाएका छन्।

एमालेले सदस्यता नदिएपछि अब कानुनी उपचार खोज्न विद्यालाई नेताहरूले सुझाव दिएका छन्। विद्या निकट नेताहरु राजनीतिमा आउनबाट रोक्नु संवैधानिक अधिकारविरुद्ध भएको बताउँछन्।

उनीहरुले यसलाई राजनीति गर्न पाउने नैसर्गिक अधिकारलाई रोक्न खोजेको र जनताको बहुदलीय जनवाद (जबज)को विरुद्ध पनि भएको भन्दै असहमति जनाएका हुन्।

अब विद्याले एमाले केन्द्रीय कमिटी निर्णयको प्रतिवाद गर्ने स्थायी समिति सदस्य कर्ण थापाले बताए। उनका अनुसार अब विद्याले कसरी अघि बढ्ने भन्ने रणनीति बनाउनेछिन्। यसका लागि उनले सल्लाह लिने उनको भनाइ छ।

‘जे निर्णय भएको छ, शतप्रतिशत गलत भएको छ। हामी त्यसको राजनीतिक रुपमा प्रतिवाद गर्छौं,’ उनले भने।

प्रक्रियाको हिसाबले पनि अमिल्दो निर्णय भएको थापाको भनाइ छ। कुनै पनि निर्णय गर्नुछ भने पहिले बैठकको एजेण्डाको रुपमा पहिले प्रस्ताव आउनुपर्छ। तर विद्याको पार्टी सदस्यता सम्बन्धी प्रस्ताव बैठकमा प्रस्तुत नभएको उनको भनाइ छ।

‘जुन विषय नै एजेण्डामा छैन, प्रस्तावमा आएको छैन, त्यही विषयमा निर्णय गर्‍यौं भन्नु नै गलत भयो,यदि निर्णय नै गर्नुपर्ने भए प्रक्रियामा लैजानुपर्थ्यो,’ थापाले भने।

पूर्वराष्ट्रपति भण्डारीले पनि एमाले केन्द्रीय कमिटी बैठकबाट आफूलाई पार्टी राजनीति गर्न रोक लगाउने निर्णय हुन सक्ने संकेत पाउनासाथ मंगलबार नै निजी निवासमा पत्रकारहरु भेला गरेर चुप लागेर नबस्ने बताएकी थिइन्।

आफ्नो पक्षमा बोल्नेहरुलाई आतंकित पार्न खोजिएको प्रति आपत्ति जनाएकी भण्डारीले अघि बढिसकेको बताएकी थिइन्।

‘म अघि बढिसकेँ, खुट्टा कमाउदिनँ,’ उनले भनीन्। आफू एमालेको राजनीति गर्ने कुरामा भयभीत नहुन पनि उनले आग्रह गरेकी थिइन्। तर अब कसरी अघि बढ्ने भन्ने चाहिँ उनले खुलाइनन्।

पूर्वराष्ट्रपति विद्यादेवी भण्डारीलाई सक्रिय राजनीतिमा रोक लगाउने एमाले केन्द्रीय कमिटीको निर्णयपछि एमाले नेता कर्णबहादुर थापाले पार्टीमा नयाँ सङ्कल्पका लागि आह्वान गरेका छन्।

उनले पार्टीभित्र देखिएको घृणा, अपमान र निषेधको अन्त्य र जनताको बहुदलीय जनवाद (जबज)का मूल्य र मान्यतालाई स्थापित गर्न नयाँ सङ्कल्पका लागि आह्वान गरेका हुन्।

‘घृणा, अपमान र निषेधको अन्त्य र जबजका मूल्य र मान्यतालाई स्थापित गर्न नयाँ सङ्कल्प गरौँ। स्वाभिमान र स्वतन्त्रताको लडाइँ नयाँ शिराबाट लडौँ। हरेक विवेकशील एमाले कार्यकर्तासँग हार्दिक अपिल गर्दछु,’ उनले फेसबुकमा लेखेका छन्।