सञ्जाल विस्तारमा आक्रामक जिली, बुटवल र विराटनगरका डिलर शो–रुम सञ्चालनमा ल्याउँदै

काठमाडौं। विश्वप्रसिद्ध जिली ई–एक्स फाइभको नेपालका लागि आधिकारीक आयातकर्ता एवं वितरक एलआरआर मोटर्सले मुलुकभर डिलरशिप विस्तारको आक्रामक योजना सार्वजनिक गरेको छ।

कम्पनीले आगामी एक वर्षभित्र नेपालभरी १४ वटा डिलर नियुक्त गर्ने भएको छ। सातै प्रदेशमा दुई–दुई वटा डिलरशिप शो–रुम स्थापना गर्ने कम्पनीको योजनाले जिली ई–एक्स फाइभ मोडेलप्रति उपभोक्ताको बढ्दो आकर्षणका साथै देशैभरी सहज रूपमा प्रिमियम गुणस्तरको इलेक्ट्रिक मोबिलिटी उपलब्ध गराउन दृढ रहेको कम्पनीले जनाएको छ।

देशभित्रका सम्पूर्ण ग्राहकहरूलाई गाडीको बिक्री, सेवा तथा स्पेयर पाट्र्समा सहज पहुँच सुनिश्चित गराउने उदेश्य बोकेको योजनाले एलआरआर मोटर्सलाई नेपालको सबैभन्दा ठूलो र विश्वासिलोमध्येको एक अटोमोबाइल कम्पनीको रुपमा विकसित गराउने यात्राको थालनी पनि गराएको दावी गरिएको छ।

कम्पनीले रणनीतिक विस्तारको पहिलो चरणअन्तर्गत विराटनगर र बुटवलका डिलरहरू नियुक्त भइसकेका छन्। तिनका शो–रुम तथा सर्भिस केन्द्रको उद्घाटन आगामी एक महिनाभित्र हुने भएको छ।
यी नयाँ शोरुमहरुले जिलीको विश्वव्यापी मापदण्डअनुरुप ग्राहकहरूका लागि सवारीसाधन प्रदर्शन, टेस्ट ड्राइभ, वित्त सुविधा, बिक्रीपछिको सेवा र जेनुइन स्पेयर पाट्र्स गरी समष्टिगत सेवा उपलब्ध गराउने भएको छ।

“सम्पूर्ण नेपालीहरुको घरदैलोसम्म नै जिली ई–एक्स फाइभ पुर्याउने उदेश्यका साथ हामीले देशव्यापी डिलरशिप विस्तारको पहिलो चरणको योजना घोषणा गरेका छौं,” एलआरआर मोटर्सका निर्देशक जीवनजंग शाही भन्छन्, “हामीलाई विश्वास छ कि विराटनगर र बुटवलमा नयाँ डिलर शोरुमा सञ्चालनमा आएपछि ग्राहकहरूले हाम्रो ब्रान्डको गुणस्तर, विश्वसनियता र नवप्रवर्तनको वाचा आफ्नै शहरमा प्रत्यक्ष रूपमा अनुभव गर्नेछन्।”

नेपालमा आएको छोटो समयमै जिली ई–एक्स फाइभले नेपाली ईभी पारखीहरुको मन जितेको दाबी कम्पनीले गरेको छ। अत्याधुनिक डिजाइन, प्रिमियम इन्टेरियर, अतुलनीय सुरक्षा विशेषता र प्रभावकारी रोड पर्फमेन्सका कारण नेपालीहरूमाझ यसको लोकप्रियता बढ्दै गएको दाबी गरिएको छ।

एलआरआर मोटर्सका बिक्री विभाग प्रमुख अधिर श्रेष्ठले विस्तार योजना देशभरका ग्राहक र सम्भावित डिलरहरूबाट प्राप्त अत्यधिक सोधपुछ र चासोको प्रतिक्रिया स्वरूप तयार गरेको बताएका छन्।

“हामीलाई देशका विभिन्न भागबाट प्रत्यक्ष फोन र सामाजिक सञ्जालमार्फत जिली ई–एक्स फाइभ बारे थप जानकारी लिन र किन्ने इच्छाका बारेमा धेरै सोधपुछहरू प्राप्त भइरहेका छन्,” उनले भने।
कम्पनीले निकट भविष्यमै अन्य विभिन्न स्थानहरुमा पनि नयाँ डिलर नियुक्त गर्दै शोरुमको स्थापना गर्दै जाने कम्पनीले जनाएको छ।