सम्झौता कार्यान्वयन नभए सशक्त आन्दोलन गर्ने सेबोन कर्मचारीको चेतावनी

काठमाडौं। नेपाल धितोपत्र बोर्ड (सेबोन) का कर्मचारीहरूले कात्तिक मसान्तसम्म सम्झौता कार्यान्वयन नभए सशक्त आन्दोलनमा उत्रिने चेतावनी दिएका छन्। नेपाल धितोपत्र बोर्ड स्वतन्त्र कर्मचारी संगठन र नेपाल धितोपत्र बोर्ड कर्मचारी यूनियनले सोमबार संयुक्त विज्ञप्ति जारी गर्दै सम्झौतामा उल्लेखित मागहरू समयमै कार्यान्वयन नभए आन्दोलनलाई निरन्तरता दिँदै अझ सशक्त ढंगबाट अघि बढ्ने जनाएका हुन्।

विज्ञप्तिमा भनिएको छ, “अर्थ मन्त्रालय र नेपाल धितोपत्र बोर्डमा क्रियाशील कर्मचारी यूनियन र संगठनबीच भएको वार्तामा अर्थ मन्त्रालयले कर्मचारीहरूले उठाएका मागहरू पूरा गर्ने सहमति जनाएको छ। साथै, कर्मचारीहरूले प्राप्त गरिरहेको सेवा–सुविधामा कटौती गर्ने वा विगतमा प्राप्त सुविधा फिर्ता गर्नुपर्ने अमानवीय प्रावधान कार्यान्वयन नगर्ने सहमति पनि भएको छ।”

कर्मचारी संगठनका अनुसार अर्थ मन्त्रालयबाट अहिलेको असहज परिस्थितिको समाधान नआएसम्म आन्दोलनलाई नयाँ स्वरूपमा अघि बढाइनेछ। सोअनुसार दैनिक एक घण्टा धर्ना कार्यक्रम निरन्तर राख्दै, पेन डाउन कार्यक्रम हालका लागि स्थगित गरी कर्मचारीहरू काममा फर्किएका छन्।

सम्झौताअनुसार एक हप्ताभित्र कर्मचारीका मागहरू सम्बोधन गरी बोर्डको कर्मचारी सेवा शर्त नियमावलीमा आवश्यक संशोधनसहित स्वीकृति दिने सहमति भएको छ।