कजरिया टायलको नयाँ शोरुम विराटनगरमा

काठमाडौँ: प्रिमियम टायल उत्पादक कम्पनी कजारियाले पूर्वी नेपालमा आफ्नो उपस्थिति विस्तार गर्दै विराटनगरको मुनाल पथमा नयाँ शोरूम सञ्चालनमा ल्याएको छ। न्यु ज्योति ट्रेडर्सद्वारा सञ्चालित शोरूमले विराटनगर तथा आसपासका क्षेत्रमा टायलको बढ्दो मागलाई लक्षित गरेको कम्पनीले जनाएको छ।

शुक्रबार बिहान सम्पन्न उद्घाटन समारोहमा कोशी प्रदेश सरकारका उद्योग, पर्यटन, वन तथा वातावरण मन्त्री भीम पराजुली प्रमुख अतिथिका रूपमा सहभागी थिए। कार्यक्रममा मिस नेपाल वल्र्ड २०२५ लुना लुइटेल र मिस नेपाल अर्थ २०२५ सोनी घलेको पनि उपस्थिति रहेको थियो। कजारिया रमेश टाइल्स लिमिटेडका निर्देशक हिमांशु अग्रवालले रिबन काटेर शोरूमको उद्घाटन गरेका थिए।

कार्यक्रममा बोल्दै मन्त्री पराजुलीले कजारियाजस्ता उद्योगहरूको लगानीले प्रदेशको औद्योगिक तथा आर्थिक गतिविधिमा योगदान पुग्ने बताए। उनले जिम्मेवार र दिगो औद्योगिक विस्तारलाई प्रदेश सरकारले प्रोत्साहन गर्ने उल्लेख गरे।

कजारिया रमेश टाइल्सका निर्देशक अग्रवालले विराटनगर शोरूम पूर्वी नेपालका ग्राहकहरूसम्म कम्पनीका उत्पादन सहज रूपमा पुर्‍याउने उद्देश्यले खोलिएको बताए। उनले न्यु ज्योति ट्रेडर्ससँगको सहकार्यप्रति पनि सन्तुष्टि व्यक्त गरे।

विराटनगरको केन्द्रमा अवस्थित शोरूममा आवासीय तथा व्यावसायिक प्रयोजनका लागि उपयुक्त विभिन्न प्रकारका प्रिमियम टायलहरू प्रदर्शन गरिएको छ। ग्राहकहरूले विभिन्न डिजाइन र आकारका टायलहरू अवलोकन तथा छनोट गर्न सक्ने व्यवस्था गरिएको कम्पनीले जनाएको छ।

कजारिया रमेश टाइल्स लिमिटेडले नेपालमै स्थापना गरेको टायल उत्पादन उद्योगमार्फत ३ हजारभन्दा बढी डिजाइनका टायल उत्पादन गर्दै आएको छ। हाल कम्पनीको नेपालभर १०० भन्दा बढी शोरूम सञ्चालनमा छन्। कम्पनीका उत्पादनमा ग्लेज्ड भिट्रिफाइड, हेभी ड्युटी भिट्रिफाइड तथा सेरामिक वाल टायलहरू समावेश छन्।

विराटनगर शोरूम सञ्चालनसँगै कजारियाले पूर्वी नेपालमा आफ्नो बजार पहुँच थप विस्तार गरेको जनाएको छ।