पाँच अर्ब लगानीमा भरतपुरमा नयाँ औषधी उद्योग ल्याउँदै देउराली जनता फर्मास्युटिकल्स

काठमाडौँ: देउराली जनता फर्मास्यूटिकल्स प्रालिले उत्पादनलाई विविधीकरण गर्दै क्षमता वृद्धि गर्ने भएको छ। उद्योगले चार अर्ब ७५ करोड रुपैयाँ लगानी गरेर अन्तर्राष्ट्रिय मापदण्डअनुसारको अत्याधुनिक नयाँ कारखाना चितवनको भरतपुरमा निर्माण गर्ने भएको छ।

यो प्रस्तावित आयोजनालाई आगामी दुई वर्षभित्र निर्माण कार्य सम्पन्न गर्ने लक्ष्य राखेको देउराली जनताका कार्यकारी निर्देशक हरिभक्त शर्माले बताए। शर्माका अनुसार नयाँ परियोजना सम्पन्न भएपछि थप ५५० जनालाई प्रत्यक्ष रोजगारीको अवसर सिर्जना हुनेछ।

उत्पादन विविधीकरण र उत्पादन क्षमता बढाउन थप लगानीको प्रयासमा सबैको सहयोग आवश्यक भएको उनले बताए।

‘विज्ञानमा आधारित गुणस्तर र सत्यनिष्ठाबाट प्रमाणित भएको हाम्रो कार्यदिशाको मर्मलाई आत्मसाथ गर्दै औषधि उत्पादनमा आत्मनिर्भर बन्ने र विश्व बजारमा नेपाली औषधिको निर्यात सम्भावनालाई साकार पार्न कम्पनी निरन्तर अघि बढिरहेको छ,’ उनले भने।

आगामी दिनहरूमा पनि जनस्वास्थ्यको क्षेत्रमा अझ प्रभावकारी नविन प्रविधि र उच्च गुणस्तरका उत्पादनमार्फत व्यावसायिक सेवाको यात्रामा अग्रणी भूमिका निर्वाह गर्ने प्रतिज्ञा उद्योगले गरेको छ।

देउराली जनताले ३५ वर्षदेखि उच्च प्रविधि आयात गरी अत्यावश्यक औषधिहरू स्वदेशमै उत्पादन गरी स्वास्थ्य सेवामा समर्पित गर्दै आएको छ।

उद्योगले अत्याधुनिक प्रविधिको प्रयोग गर्दै अत्यावश्यक जीवन रक्षक औषधिहरू र विभिन्न दीर्घ रोगहरूको उपचारमा आवश्यक पर्ने क्याप्सुल, ट्वालेट, लिक्विड, ओन्टिमेन्ट र ड्राइपावडरलगायत २९६ प्रकारका जीवन रक्षक औषधिहरू उत्पादन गरिरहेको छ।

औषधीको अनुसन्धान, उत्पादनका साथै उत्पादनहरूको गुणवत्ता निर्धारण गर्ने अत्याधुनिक प्रविधि र उपकरणसहितको सुविधा सम्पन्न कारखाना निर्माण गरि अन्तर्राष्ट्रिय स्तरको गुणस्तरीयता भएका औषधिहरू नेपाली जनतालाई उपलब्ध गराईरहेको उद्योगले जनाएको छ।

देउराली जनताको औषधि व्यापार बढ्यो, एक वर्षमा दुई अर्ब ३५ करोडको कारोबार

‘३५ औं वार्षिकोत्सवको विशेष अवसरमा विगतका हाम्रा अनुभवहरूको उपयोग गर्दै औषधिको गुणात्मक स्तर वृद्धि गरी यस क्षेत्र राष्ट्रलाई आत्मनिर्भर बनाउन योगदान गर्न हामी संकल्पित छौँ,’ कार्यकारी निर्देशक शर्माले भने।

देउराली जनता नेपालको औषधि उत्पादन क्षेत्रमा प्रविधि हस्तान्तरणमार्फत उच्चस्तरीय अन्तर्राष्ट्रिय प्रविधि आयात गर्ने पहिलो र एकमात्र उद्योगको रूपमा स्थापित भई कुशल उत्पादन एवं गुणस्तर नियन्त्रण प्रक्रिया तथा वातावरणीय मापदण्ड पूरा गरेको आधारमा प्रदान गरिने आइएसओ प्रमाणीकरणहरू र विश्व स्वास्थ्य संगठनको मापदण्ड बमोजिम अन्तर्राष्ट्रियस्तरको कुशल औषधि उत्पादन प्रक्रिया पूरा गरेको आधारमा प्रदान गरिने (डब्ल्युएचओ जीएमपीको प्रमाणपत्र प्राप्त गर्ने नेपालको पहिलो औषधि उद्योग हो।

आर्थिक मन्दी र बजारको उतारचढावका बीच पनि उद्योगले अघिल्लो वर्षको तुलनामा १६ प्रतिशत व्यापार बढाएको छ।

एक वर्षमा देउराली जनताले दुई अर्ब ३५ करोड रुपैयाँको औषधि व्यापार गरेको छ। अघिल्लो वर्ष उद्योगले दुई अर्ब दुई करोड ३० लाख रुपैयाँ व्यापार गरेको थियो। एक वर्षमा देउराली जनताको व्यापार ३२ करोड ७० लाख रुपैयाँ बढेको छ।

देउराली जनताले सन् २०२३ मा एक अर्ब ८६ करोड ४० लाख, २०२२ मा एक अर्ब ७० करोड ५० लाख र २०२१ मा एक अर्ब ४६ करोड ६९ लाख रुपैयाँ व्यापार गरेको जनाएको छ।